کوئٹہ ٹی سُو بہا کروک و تندور آتا برخلاف سخت کریک ڈاؤن

السی غاو و ڈپٹی کمشنر کوئٹہ مہراللہ بادینی نا پارت آ مچ آ ضلع ٹی سُو بہا کروک و تندور آتا برخلاف سخت کریک ڈاؤن برجا ءِ‘ دا رد اٹ کارروائی تا وخت آ کم وزن ارغ و کبین نہاد آتیا سو بہا کروک آتا برخلاف کانودی کارروائی کننگا و جم وڑ اٹ جتا جتا علاقہ غاتیان 48 بندغ ءِ دزگیر کننگا، ہرافتیان 35 بندغ ءِ جیل آ گدریفنگا، وخت اس کہ کیہی دکاندار آتے سخت وارننگ جاری کننگا۔ اسسٹنٹ کمشنر صدر محمد یوسف ہاشمی نواں کلی و عالمو چوک اٹی کارروائی کرسا 12 بندغ ءِ دزگیر کرے، وخت اس کہ اسسٹنٹ کمشنر سٹی و اسپیشل مجسٹریٹ اعجاز حسیب کھوسہ گوالمنڈی و کاسی روڈ آ کارروائی کرسا 14 بندغ ءِ دزگیر کرے۔ داکان بیدس اسسٹنٹ کمشنر کچلاک کیپٹن (ر) کبیر زرکون کچلاک بازار اٹی کارروائی کرسا 10 بندغ ءِ دزگیر کرے و اسسٹنٹ کمشنر سریاب مصور احمد اچکزئی و اسپیشل مجسٹریٹ عزت اللہ سب ڈویژن سریاب اٹی کارروائی کرسا 12 بندغ ءِ دزگیر کریر۔ ضلعی انتظامیہ پیدوار کرینے کہ سرکاری نہاد لڑا نا خلاف ورزی، کبین نہاد آ سو بہا کننگ، کم وزن ارغ تننگ و ایلو ناروا کٹیاکار آتا برخلاف کارروائیک بے فرق آن برجا سلرہ تانکہ شاری تے ریلیف فراوان کننگ مرے۔