کورونا نا تالانی ٹی کنا ہچ ءُ کڑد اس اف، بِل گیٹس

واشنگٹن ( آن لائن) مائیکرو سافٹ کمپنی نا مالک بل گیٹس پارینے کہ کورونا وائرس نا تالانی ٹی اوفتا ہچ ءُ کڑد اس اف۔ امریکی نشریاتی ادارہ ءِ تروک ءُ اسہ انٹرویو سے ٹی بل گیٹس پارینے کہ کورونا نا تالانی آن پد سوشل میڈیا آ اونا بابت وڑ وڑ نا ہیت کننگ انگ ءِ۔ او سازشی نظریہ نا اسہ مرغن ءُ وڑ اس برجا ءِ، او کہی بولی تیٹی کلہو سر کننگ کن کاریم اٹ اتوک آ ایپ آتا کمک اٹ اوفتے تنقید نا نشانہ جوڑ کننگ انگ ءِ کہ بل گیٹس ویکسینیشن و الیکٹرانک مائیکرو چپس انا کمک اٹ دنیا نا 15 درسد آبادی ءِ چٹفنگ نا خواہندار ءِ۔ او دا دوبہ ءِ رد کرسا پارینے کہ بل گیٹس فاونڈیشن مچ آ دنیا ٹی ہچ ءُ پین ادارہ سے نا مقابلہ ٹی ہلوک آ ناجوڑی تا ویکسین ہلنگ کن زیات پیسہ تسنے تانکہ ناجوڑ آتا جان ءِ بچفنگے۔ او مستی پارینے کہ بل گیٹس فاونڈیشن تدوک آ 20 سال آتیان شون ہلوک آ ملک آتا اُلس نا جانجوڑی ءِ جوان کننگ کن پدریسہ کروڑ آ ڈالر آتے خڑچ کرینے۔