بلوچستان اٹ حالیت آتے اسہ وار ولدا خراب کننگ انگ ءِ‘بی این پی چاغی

چاغی(آن لائن) بلوچستان نیشنل پارٹی نا کنڈآن پارٹی راہشون ومسکوہی پروفیسر عبدالخالق ریکی عبدالرشید بلوچ و وڈھ انا ہندو پوریاگر نانک چند نا ٹارگٹ کلنگ نابرخلاف پارٹی آفس نا پیشن آ برانزی مچی اڈ تننگا۔ برانزی مچی آن ضلعی جنرل سیکرٹری ثناءاللہ بلوچ وایلو ترانکار آک تران کرسا پاریر کہ بلوچستان اٹ حالیت آتے اسہ وار ولدا خراب کننگ انگ ءِ‘ صوبائی حکومت الس ءِ رکھ تننگ اٹ پورو وڑاٹ بے سہب مسنے‘ بلوچستان اٹ ہڑدے بندغ آتا کشت وخون مننگ اٹی ءِ وبندغ آک اُراتے ٹی ہم رکھوک افس ولے صوبائی حکومت جوانی نا رٹہ خلنگ اٹی ءِ۔ او پاریر کہ بلوچستان نا سیاسی عمل ءِ توننگ کن مدام ڈیتھ اسکواڈ ءِ کاریم اٹ اتسا اوفتے سیاسی کارندہ غاتے کسر آن اینک کننگ نا ٹاسک تننگانے تاکہ بلوچستان نا سیاسی کارندہ غاک تینا حق آتیکن توار چست کپس۔او پاریر کہ بلوچستان نیشنل پارٹی اسہ سیاسی و جمہوری ءُ پارٹی سے و بلوچستان اٹ مروک بیدادی و بے انصافی تیا چپ تولپک۔