اسپیکر قومی اسمبلی نا حاجی تے مبارکبادی

اسلام آباد: اسپیکر قومی اسمبلی راجہ پرویز اشرف حاجی تے حج کننگ آ مبارکبادی ترسا اللہ تعالیٰ آن غٹ عالم اسلام نا شونداری و شونہالی و مون تروک مشکل آتیان نجات کن دعا کرینے۔ سے شنبے نادے آ یوم عرفہ نا وخت آ تینا کلہو اٹی اسپیکر پارے کہ حج انا گچین بست وبند آ پاکستان و سعودی عرب نا حکومت و خاص وڑاٹ خادم حرمین الشریفین ءِ خراج تحسین پیش کیوہ۔ اوپارے کہ حج اسلام نا اہم ءُ رکن اسے دا فرض انا اداکننگ خوش بختی نا سوب ءِ۔ اللہ تعالیٰ آن دعاءِ کہ دا بابرکت و مبارک دے انا صدقہ غٹ عالم اسلام آ تینا خاص فضل و کرم و مہربانی تے کے، و ننے انفرادی و اجتماعی مالی،زرگزرانی وسیاسی مشکل آتیان نجات عطاکے۔ اللہ تعالیٰ مقبوضہ فلسطین و کشمیر نا آجوئی کن برجا کوشست آتے سرسہب کے۔ اللہ تعالیٰ بھارت نا غیر کانودی کوزہ ٹی جموں وکشمیر و فلسطین اٹ رہینگوک آ مظلوم انسانی تے ڈکھیائی و مصیبت آتیان نجات عطاکے۔ اودعاکرے کہ ننا اسیجائی کوشست آتا سوب آن بروک آ وخت اٹی سوگوی برے و شونداری و شونہالی نا مزل آتے طے کے۔

(اے پی پی)