بھارتی بیداد و گستاخانہ خاکہ غاک است ہسونی نا سوبءُ‘ عمران خان

اسلام آباد (مانیٹرنگ ڈیسک) وزیراعظم عمران خان اقوام متحدہ نا جنرل اسمبلی نا دیوان آن تران اٹ مقبوضہ کشمیر اٹ بھارتی بیدادی وگستاخانہ خاکہ غاتا ویل آ ہیت کرے۔  اقوام متحدہ نا 75 میکو جنرل اسمبلی اجلاس آن کم از کم  27 منٹ آ تالان تینا تران اٹ وزیراعظم عمران خان کورونا وائرس، ڈیہہ اٹ سلہہ نا گو، گستاخانہ خاکہ غاتا شینکاری، کشمیر اٹ بھارتی بیدادی، فلسطین اسرائیل جھیڑہ، ماحولیات و اقوام متحدہ و سلامتی کونسل اٹ بھلو کچ اسے ٹی اصلاحات آمبار انگا اہم انگا ویل آتیا ہیت وگپ کرے۔ وزیراعظم نا ریکارڈ مروک آ تران شینک کننگ آن مست جنرل اسمبلی ٹی ساڑی اقوام متحدہ ٹی پاکستان نا مستقل مندوب منیر اکرم بنائی ہیت آتے ادا کرے۔ تینا تران اٹ کل آن مست وزیراعظم عمران خان پاکستان اٹ تینا حکومت نا جوڑ مننگ آن پد بنداوی اصلاحات نا بابت اٹ ہیت وگپ کرے او پارے کہ اواقتدار ءِ سنبھالنگ آن پد پُوسکن  ءُ پاکستان اسے نا بنداو ءِ ریاست مدینہ نا اصول آتیا تخا۔ او پارینے کہ ملک اٹ ریاست مدینہ نا وڑ انا حکومت اس جوڑ کننگ کن ننے امن و استحکام نا گرج ءِ و ہندا سوب ءِ کہ ننا خارجہ پالیسی ٹی علاقائی امن و سلامتی ءِ اولیت دوئی ءِ و ننا سلا ءِ کہ کل ویل آک ہیت وگپ انا کمک اٹ ایسر مریر۔