پاکستان ءِ اولیکو ٹی ٹوئنٹی ٹی بے سہب کرسا سیریز نا بنا ءِ سرسہبی ٹی کینہ‘معین علی

مانچسٹر (مانیٹرنگ ڈیسک) انگلینڈ کرکٹ ٹیم نا پنی آ آل راؤنڈر معین علی پارینے کہ گرین شرٹس ءِ اولیکو ٹی ٹوئنٹی میچ اٹ بے سہب کرسا مسہ میچ آتا سیریز نا بنا ءِ سرسہبی ٹی کینہ، پاکستان ٹیم نا برخلاف ٹیسٹ سیریز اٹ 1-0 نا سرسہبی آن پد ٹیم نا حوصلہ بڑز ءِ، اونا ٹیم ٹی ٹوئنٹی سیریز آن مست جوان تیاری تے ٹی اختہ ءِ، مہمان ٹیم نا برخلاف ٹیسٹ سیریز اٹ سرسہبی آن پد ہم ٹی ٹوئنٹی سیریز ءِ آسان ہلپک، اونا ٹیم اٹ ہندن ءُ گوازی گر ساڑی ءُ ہرا وخت انا وخت اس میچ ءِ بدل کننگ نا لائخی تخرہ۔ تینا اسہ بیان اسے ٹی او پارینے کہ او پاکستان نا برخلاف بنائی ٹی ٹوئنٹی میچ اٹ جوان کارکڑد انا درشانی ءِ کرسا تینا ٹیم نا سرسہبی ٹی اہم ءُ کڑد اس ادا کیک۔ معین علی پارینے کہ او پورو وڑ اٹ فٹ ءِ او گرین شرٹ آتا برخلاف مسہ میچ آتا سیریز نا اولیکو میچ اٹ بشخ ہلنگ کن بے چین ءِ۔ اسہ سوج اسے نا ورندی ٹی او پارینے کہ مہمان ٹیم ءِ بنائی میچ اٹ بے سہب کرسا سیریز نا بنا ءِ سرسہب وڑاٹ کینہ۔ او پارینے کہ حریف ٹیم نا برخلاف سیریز اٹ سرسہبی کن ٹیم ءِ مسہ بشخ آتے ٹی سد درسد کارکڑد نا درشانی ءِ کروئی مریک۔