وزیراعلیٰ ہیپاٹائٹس فری بلوچستان پروگرام نا کوشست آک ستا کڑزرہ‘فضیل اصغر

کوئٹہ (خ ن) چیف سیکرٹری بلوچستان کیپٹن(ر) فضیل اصغر پارینے کہ صوبہ ٹی ہیپاٹائٹس بی، سی و ڈی(کو انفیکشن) گڑتی نا دنگ اسکان ودنگ اٹی ءِ ہرانا توننگ کن حکومت غٹ اسٹیک ہولڈر آتون اسیجائی اٹ ماس اسکریننگ، ویکسین و آگاہی مہم چلیفک۔ وزیراعلیٰ ہیپاٹائٹس فری بلوچستان پروگرام نا کوشست آک ستا کڑزرہ۔ پروگرام تون صوبائی حکومت ہر وڑ انا کمک کیک۔ دا ہیت آتے او سَے شنبے نا دے صوبہ ٹی ہیپاٹائٹس بی و سی نا حالیت نا جاچ ءِ ہلنگ نابابت اڈ ہلوک دیوان آن تران کرسا کرے۔ دیوان اٹ سیکرٹری جانجوڑی دوستین جمالدینی، صوبائی کوآرڈینیٹر وزیراعلیٰ ہیپاٹائٹس فری بلوچستان ڈاکٹر گل سبین کاکڑ وایلو کمامدار آک ساڑی ئسر۔ دیوان ناشریدار آتے بریفنگ ترسا ڈاکٹر گل سبین کاکڑ پارے کہ بلوچستان نا آبادی نا 8 آن 10درسَد ہیپاٹائٹس نا گواچی ءِ ولے آگاہی و ٹیسٹ کپننگ ناسوب آن بھاز آ بندغ آتے ٹی داناجوڑی نا وخت آ تشخیص و درمان مفک۔ او پارے کہ صوبہ نا 10 ضلع نصیرآباد، جعفرآباد، پنجگور، لورالائی، بارکھان، صحبت پور، ژوب، موسیٰ خیل، کوہلو، ڈیرہ بگٹی ہیپاٹائٹس نا بابت ہائی رسک آٹو۔