بھارت نا اصل دروشم ءِ دنیا نا مون آ پاش کننگ نا گرج ءِ، ڈاکٹر علوی

اسلام آباد: صدر مملکت ڈاکٹر عارف علوی پارینے کہ بھارت مقبوضہ کشمیر اٹ انسانی حق آتا خلاف ورزی تا گواچنی مننگ اٹی ءِ۔ بھارت نا اصل چہرہ ءِ دنیا نا مون آ پاش کننگ نا گرج ءِ۔ ایوان صدر آن جاری بیان نا رداٹ صدر عارف علوی آن تیونس اٹ پاکستان نا پندار سلاہکار جاوید احمد عْمرانی اوڑدہی کرینے۔ صدر مملکت نا پاننگ ئس کہ تیونس تون ارا کنڈی واپاری نا جوانی کن بھلو کچ اسے ٹی کمک اقتصادی کمک ءِ ودفوئی تمک۔ پاکستان و تیونس نا ایوانک صنعت و واپاری نا نیام اٹ حال احوال نا گرج ءِ۔ صدر مملکت پارینے پاکستان تیونس تون تاریخی و ایلمی آ تعلقداری ءِ بھاز اہمیت ایتک۔ پاکستان و تیونس جتا جتا ویل آتیا تینا خیال آتا خواہندار ءِ۔ پندار آ سلاہکار تعلیم، دود ربیدہ و رکھ انا بشخ اٹ تیونس تون تعلقداری ءِ پین سوگو کننگ اٹ کڑد ادا کیر۔ صدر بین المذاہب ہم آہنگی، جموں و کشمیر نا جھیڑہ، فلسطین و اسلامو فوبیا آنبار انگا جہانی ویل آتا ایسری ٹی کمک کننگ کن او آئی سی نا بارواٹ تیونس نا وڑن نا ستا ءِ کرے و اقوام متحدہ نا انسانی حقوق کونسل اٹ ” انسداد ِ مذہبی منافرت ” آ پاکستان نا کنڈآن پیش کروک آ قرارداد آ تیونس نا مخ تفی نا ستا ءِ کرے۔

(آن لائن)