نوشکے، کوئٹہ ٹی برانز کروک طالب علم آتا دزگیری نا برخلاف بلوچ طلباءنا برانز

نوشکے (تلار حوالکار) نوشکے پریس کلب نا پیشن آ کوئٹہ ٹی آن لائن کلاس تا برخلاف برانز کروک مار ومسڑ طالب علم آتے دزگیر کننگ نابرخلاف بلوچ طلباءنوشکے نا کنڈآن برانزی مچی اڈ تننگا‘ دا وخت آ طالب علم راہشون صدام بلوچ، ہارون بلوچ، امدادبلوچ، نیشنل پارٹی نا صوبائی جنرل سیکرٹری خیر بخش بلوچ، بلوچستان نیشنل پارٹی نوشکے نا ضلعی صدر عطاءاللہ مینگل، بی ایس او پجار نا حق نواز شاہ، جمعیت علماءاسلام نا حافظ عبداللہ گورگیج، طالب علم راہشون دانیال بلوچ، سجاد بلوچ وایلوفک تران کرسا پاریر کہ صوبائی دارالحکومت کوئٹہ ٹی پولیس جمہوری وڑ اٹ برانز کروک مار ومسرطالب علم آتے دزگیر کرسا بندی کرے ہرانا مذمت ءِ کینہ۔ او پاریر کہ اینو نا برانز اسہ تپّہ‘ اسہ ذات اکن اف بلکہ مچ آ بلوچستان و بلوچ قوم اکن ءِ‘ ننا تعلیمی نظام بھاز ہیبدار ءِ‘ نن تینا تعلیم نا حق اکن برانز کننگ اٹی ان، تعلیم آن بیدس شون ہلنگ مفک‘ تعلیم نا پن آ ہرا آن لائن کلاس تا بناءِ کننگ انگ ءِ ایہن تو او جوان ءُ عمل اسے ولے انٹرنیٹ نا آسراتی ہم تننگے‘ آن لائن کلاس تے بیرہ ایلیٹ تپّہ کن جوڑ کننگانے‘ آواران اٹ ٹیل فون و نیٹ انا آسراتی اف گڑا او امر آن لائن کلاس ہلنگ کیرہ‘ ہندا وڑ بلوچستان نا بھاز آضلع غاک موبائل و نیٹ انا آسراتی آن محروم ءُ‘ نن تون تھری جی و فور جی نا پن آ دُرو کننگ انگ ءِ‘ او پاریر کہ ہراتم ننا بلوچ نیاڑیک اُراتیا پیشن مرسا تعلیمی پڑ آ بریرہ ولے آسراتی افس و ہراتم برانز کیرہ تواوفتا گُد آتے کشسا اوفتے دزگیر کننگک۔ او پاریر کہ بلوچستان نا بھلا آبادی انٹرنیٹ نا آسراتی آن محروم اف و بھاز آ علاقہ غاتے ٹی نیٹ ورک و انٹر نیٹ تھری و فور جی ءِ بند کننگانے تو گڑا آن لائن کلاس آک امر سرسہب مریرہ۔