پاکستان و مالدیپ نا تعلقداری تین پہ تینی پت، شرف و اسیجائی فائدہ غاتیا تالان ءِ،سیدال خان ناصر

اسلام آباد، قائم مقام چیئرمین سینیٹ سیدال خان ناصر تون مالدیپ نا پیپلز مجلس نا اسپیکر عبدالرئیم عبداللہ پارلیمانی ڈل اتون اوار اسلام آباد اٹ اوڑدہی کرے۔ اوڑدہی ٹی پاکستان و مالدیپ نا متکن سنگتی نا تعلقداری، پارلیمانی سفارتکاری، ہڑتوم آ کنڈآتاواپار و زرکاری، تعلیم، دفاع، سیل وسوات، موسمیاتی بدلی، السی رابطہ غاک و تین پہ تینی است خواہی نا ایلو امور تیا سرجمی اٹ گپ و تران کننگا۔ سینیٹ سیکرٹریٹ نا رداٹ قائم مقام چیئرمین سینیٹ مالدیپ نا پیپلز مجلس نا اسپیکر و شرفمند پارلیمانی ڈل ءِ پاکستان آ بننگ آ بخیر کرسا پارے کہ پاکستان و مالدیپ نا تعلقداری تین پہ تینی پت، شرف، اسیجائی فائدہ، اسلامی اخوت و متکن سنگتی نا رابطہ غاتیا استوار ءُ۔ او پارے کہ پاکستان ہڑتوم آ کنڈآتا تعلقداری تون اوار اوار سارک، او آئی سی و اقوام متحدہ نا چندی فورم تیا ہم مالدیپ تون کمکاری ءِ خاص اہمیت ایتک۔سیدال خان ناصر پارے کہ پارلیمانی سفارتکاری ہڑتوم آ ملک آتا نیام اٹ تین پہ تینی مفاہمت، ادارہ جاتی کمک و السی کہول آ رابطہ غاتے مون آ دننگ اٹ بھلو کڑد اس ادا کننگ کیک۔ او ہڑتوم آ ملک آتا پارلیمان تانیام اٹ ڈل آتا ہن و بر، آزموندہ غاتا بشخنگ و پارلیمانی رابطہ غاتے پین ودفنگ نا گرج آ زور شاغا۔ او پارے کہ پاکستان و مالدیپ نا نیام اٹ واپار و اقتصادی کمک نا بھلو گمان اس ساڑی ءِ۔ براہِ راست فضائی و سمندری رابطہ، گچین مارکیٹ رسینگ و نجی بشخ انا فعال اور مننگ آن ہڑتوم آ کنڈآتا واپار و زرکاری ءِ پین مون آ دننگ مریک۔ او پارے کہ پاکستان ٹیکسٹائل، برنج، سرمٹ، سُو، سوزی، میوہ، دوائی جوڑ کننگ و ایلو مصنوعات نا بشخ آتیٹی مالدیپ تون واپاری کمک ءِ ودفنگ نا خواہندار ءِ۔قائم مقام چیئرمین سینیٹ مالدیپ نا طالب علم آتے کن پاکستانی یونیورسٹی تیٹی بڑزکو تعلیم نا گیشتر وارخواہی ودی کننگ نا گرج آ ہم زور شاغا۔ او پارے کہ طب، انجینئرنگ، فارمیسی، دندان سازی و ایلو بشخ آتیٹی پاکستانی تعلیمی ادارہ غاک مالدیپ نا طالب علم آتے آب اٹ تعلیم و تربیت تننگ اٹ بھلو کڑد اس ادا کننگ کیرہ۔ موسمیاتی بدلی نا بابت سیدال خان ناصر پارے کہ پاکستان و مالدیپ ہڑتوم آک موسمیاتی بدلی نا منفی اثر آتے آن زہمی ملک آتیٹی اوار ءُ، ہندا سوب آن ہڑتوم آ ملک آتا نیام اٹ موسمیاتی پٹ وپول، آزموندہ غاتا ہل و تس، استعدادِ کار اٹ ودکی و شریداری گام گیج آتے مون آ دننگ نا گرج ءِ۔ او دفاعی تربیت، سمندری سلامتی و کاریم نا کچ اٹ کمکاری ءِ پین ودفنگ نا گرج آ ہم زور شاغا و پارے کہ ہڑتوم آ ملک آتا نیام اٹ دفاعی رابطہ غاک تین پہ تینی پت و کمکاری ءِ پین سوگو کننگ اٹ کمکار جوڑ مننگ کیرہ۔