لمہ نا جانجوڑی تون چناتا جانجوڑی و ردنگ گنڈوک ءِ‘گورنر بلوچستان

کوئٹہ (خ ن) گورنربلوچستان امان اللہ یاسین زئی پارینے کہ لمہ نا جانجوڑی تون چناتا جانجوڑی و ردنگ گنڈوک ءِ‘ ہندا سوب آن جانجوڑ راج انا ٹہیفنگ نا رد اٹ نیاڑی و چناتے ناجوڑی تیان بچفنگ کن رکھی ٹیہ غاتا کورس المی ءِ‘ گورنر بلوچستان پارے کہ تشنج اسہ خطرناک ءُ ناجوڑی سے‘ رکھی گام گیج تینائی کننگ و وخت آ ویکسینیشن کرسا دادے آسانی اٹ توننگ مریک۔ دا خیال آتا درشانی ءِ او دو شنبے نادے مچ آصوبہ ٹی 24 آن 29 اگست اسکان انسداد تشنج مہم نا مسٹمیکو راؤنڈ نا باقاعدہ بناءِ کرسا کرے۔ داوخت آ صوبائی سیکرٹری جانجوڑی دوستین جمالدین، صوبائی کوآرڈینیٹر پروگرام برائے امیونائزیشن ڈاکٹر اسحاق پانیزئی، امیونائزیشن آفیسر یونیسف ڈاکٹر اورنگزیب کمال، ڈی ایچ او ڈاکٹر احمد زمان و ڈاکٹر رحمت اللہ کاکڑ ہم ساڑی ئس۔دا وخت آ گورنر بلوچستان پارے کہ راجی پامداری وآگہی ودفنگ نا بابت میڈیا ناکڑدار بھاز اہم ءِ۔او پارے کہ تشنج نا برخلاف جہانی ادارہ غاتا کمک نا جوان ءُ زہم تمک و الس نا پبی وڑاٹ بشخ ہلنگ آن تشنج نا برخلاف حکومتی مہم نا سرسہبی پک مریک۔