ملک ڈیفالٹ مسکہ تو قیامت اسکان کنا کردار لپی مسکہ، شہباز شریف
نیازی حکومت تینا سیاست کن ریاست ءِ ندر کرے، قوم انا حالیت ءِ بدل کننگ کن کشکول ءِ پرغوئی تمک، شہنشاہی خڑچ و کرپشن نا چٹفنگ اسکان ملک شون ہلنگ کپک، وزیر اعظم نا
ڈیرہ اسماعیل خان : وزیراعظم محمد شہباز شریف پارینے کہ کنا دور حکومت اٹ ملک دیوالیہ مسکہ تو کنا پیشانی و قبر آ قیامت اسکان لپ لگاکہ۔ نیازی حکومت تینا سیاست کن ریاست ءِ قربان کننگ کن ہر وڑ ءِ کرے‘قوم انا حالیت ءِ بدل کروئی ءِ تو کچکول ءِ پرغوئی تمک‘ تانکہ شہنشاہی خڑچ‘ کرپشن ءِ چٹفنپگک ملک شون ہلنگ کپک۔ ڈیرہ اسماعیل خان اٹ شونداری ڈٹ آتا بنداو ءِ تخنگ نا دود آن تران کرسا وزیراعظم پارے کہ اینو کنا ڈیرہ اسماعیل خان نا چارمیکو دورہ ءِ کنا کن شرف انا ہیت اسے کہ ای نما مون آ اسہ ولدا حاضر اُٹ۔ اوپارے کہ 15، 16 تُو انا چنکو وخت اٹ ننے تاریخ نا سخت انگا چیلنج آک رسینگار دادے پارہ کہ کوٹ کننگ تون ترونگڑ کرے‘ 11 اپریل 2022 آ ہراتم ای اقتدار ءِ سنبھالاٹ کنے تو احساس ئس کہ حالیت آک سخت ءُ ولے داخس اندازہ الو کہ حالیت آک بھاز بھس مروک ءُ۔اوپارے کہ ہراتم اقتدار ءِ سنبھالاٹ تو تاریخ نا بھلا نوکاپ بس ہرانا بحالی کن ای 100 ارب روپئی خڑچ کریٹ ولے نوکاپ نا زہمی تا حق ولدا ہم ادا مننگ کتو‘ دانا سوب وسیلہ غاتا تنکی ءِ۔ وزیراعظم پارے کہ ای تینا سیاسی کیریئر اٹ داخس چیلنج خنتویسٹ‘ مولانا فضل الرحمن، پیپلزپارٹی ایلو سرکڑدہ غاتتون اوار کنا قائد الس آ کبینی ناسوب آن فریشان ئس و کنے سوج کریکہ کہ امر مریک؟اومستی پارے کہ کنا ورندی ہندا ئس کہ ہندن مریک و مرسا کیک کہ نیازی حکومت تینا سیاست کن ریاست ءِ قربان کننگ کن ہر وڑ ءِ کرے وخت اس کہ ننا حکومت فیصلہ کرے کہ نن سیاست ءِ قربان کینہ ولے ریاست ءِ بچفنہ۔ اوپارے کہ ہندا ہمو فیصلہ ئس ہرانا سوب آن سوگو سلیسن نہ تو اینو ملک قربان مسکہ تو ہراڑے سیاست و ہراڑے وزارت عظمیٰ، نن دانا بھلو نہاد اس ادا کرین ولے ننا نک لڑزتوس‘ تدوک آ حکومت اٹ پیشن ملک آن خولم بٹنگوئی تما ولے ننا دور اٹ ریکارڈ خولم ودی مس‘ اوپارے کہ پی ٹی آئی ناچیئرمین آئی ایم ایف تون کروک معاہدہ ءِ پرغا ہرانا نسخان ءِ ننے ہرفوئی تمنگ اٹی ءِ‘ نن ملک ءِ دیوالیہ مننگ آن بچفین‘ دا اللہ تعالیٰ نا بھلو کرم اس مس کہ نن ہم ڈیفالٹ آن بچان‘ اگہ کنا حکومت اٹ ملک ڈیفالٹ مسکہ تو قیامت اسکان کنے آ و کنا قبر آ لپ لگاکہ کہ کنا دور اٹ دا وڑ مس‘ ملک ڈیفالٹ مسکہ تو ملک انا صنعت ءِ بھلو نسخان اس مسکہ‘ ملک دیوالیہ مسکہ تو ارغ و دوائی کن پیسہ متوکہ‘ وزیراعظم پارے کہ پی ٹی آئی حکومت تینا سیاست کن ریاست ءِ بھاز نسخان رسیفے‘ قوم انا حالیت ءِ بدل کروئی ءِ تو کچکول ءِ پرغوئی مریک‘ اگہ نن گچین کاری تے ٹی سرسہب مسن تو اسہ وار ولدا اسیجائی اٹ ملک انا تقدیر ءِ بدل کینہ۔ وزیراعظم پارے کہ تانکہ شہنشاہی آ خڑچ و کرپشن ءِ چٹفنگپک ملک شون ہلنگ کپک۔وزیراعظم شہباز شریف پارے کہ قوم انا زمواری ءِ کہ نابود آتا کسر ءِ تورے، وونٹ و گچین کاری قوم انا حق ءِ، قول کیوہ کہ پگہ غا ولدا دن انگا بندغ آک بیٹ کننگار تو گٹ اٹ تا ہلسا کشوہ تا۔
(آن لائن)