سال انا اولیکو نیمہ ٹی مچ آ دنیا ٹی کن خور انا گڑاتا نہاد آتیٹی ودکی

اسلام آباد : جہانی بینک پارینے کہ برجاسال انا اولیکو نیمہ ٹی مچ آ دنیا ٹی کن خور انا گڑاتا نہاد آتیٹی ودکی نا کچ پدریسہ برجاءِ۔ داہیت ءِ جہانی بینک انا کنڈآن ”فوڈ سیکورٹی اپ ڈیٹ“ نا پن اٹ جاری کروک اسہ ساڑی رپورٹ اسے ٹی پاننگانے۔ رپورٹ اٹی پاننگانے کہ جنوری آن مئی اسکان نا مد اٹی کم کٹیا تخوک 61.1درسد ملک آتیٹی کن خور انا گڑاتا کبینی نا کچ 5 درسد آن زیات ریکارڈ کننگا، ہندا وڑ نیامی کٹیا تخوک آ 79.1 دسد و اپرمڈل انکم والا 70 درسد ملک آتیٹی کبینی نا کچ 5 درسد آن زیات ءِ ہراٹی کیہی ملک آک ہندن ءُ ہراڑے افراط زر نا کچ دوہراہندسہ ٹی ءِ، زیات کٹیا تخوک 78.9درسد ملک آتیٹی کبینی نا کچ 5 درسد آن زیات ءِ۔ رپورٹ نا رداٹ سویلی ایشیا، افریقہ، قطبی امریکہ، لاطینی امریکہ و نیامی ایشیانا ملک آتیٹی کنوئی آ گڑاتا کبینی نا کچ زیات ءِ۔ رپورٹ اٹی کشاری مداخل نا نہاد آتیٹی ودکی نا ہم حوالہ تننگانے۔ رپورٹ اٹی پاننگاکہ کھد آتا نہاد اٹی اسہ درسد ودکی آن کشاری مصنوعات آتا نہاد آتیٹی 0.2 درسد نا کچ آن ودکی مننگ ءِ، اونا اثرآتیان لائیو اسٹاک نا بشخ ہم زہمی مریک۔ رپورٹ اٹی پاننگاکہ جہانی بینک غذائی سلامتی ءِ پک کننگ کن گام گیج کننگ ءِ، جہانی بینک اپریل 2022اٹی غذائی سلامتی نا بشخ اکن 15 تُوانا مد اٹی 30 ارب ڈالر نا کمک فراوان کننگ نا پڑو کریسس ہرا فتیان 12 ارب ڈالرنا پوسکن آ ڈٹ آک اوار ءُ۔

(اے پی پی)