پی ٹی آئی حکومت نزور ءِ، صحافی تا تنقیدی ٹوئٹ آن ہبکہ مریک، بلاول بھٹو

0

Get real time updates directly on you device, subscribe now.

 اسلام آباد(آن لائن ) پاکستان پیپلزپارٹی نا چیئرمین بلاول بھٹو زرداری پارینے کہ پی ٹی آئی حکومت ہنداخس نزور ءِ کہ اسہ صحافی سے نا تنقیدی ٹوئٹ آن ہبکہ مریک، پاکستان پیپلزپارٹی ہر دور اٹی میڈیا نا آجوئی کن جنگ تسنے، پاکستان نا میڈیا ورکر آتے ہم ہچ گہس تنیا الیپنہ۔ حوال نا رداٹ چیرمین پیپلز پارٹی تدوک آ دے بارہ کہو نا علاقہ ٹی صحافی مطیع اللہ جان نا اُرا غا ہنا و مطیع اللہ جان تون اوڑدہی کننگ آن پد اونا برمتہ و لٹ تننگ نا مذمت ءِ کرے۔ حوال نا رداٹ بلاول بھٹو زرداری صحافی مطیع اللہ جان تون اوڑدہی کرسا اوڑتون اُست خواہی نا درشانی ءِ کرے و اونا برمتہ کروک آتا برخلاف کارروائی کننگ نا خواست کرے۔ او وخت آ مطیع اللہ جان اونا برمتہ نا ویل آ زوت اس توار چِست کننگ نا بابت اٹ بلاول بھٹو نا منتواری ءِ ہرفے و اودے سنسرشپ و صحافی تا بیروزگاری نا بابت معلومدار کرے۔ چیئرمین بلاول بھٹو زرداری تون صحافی مطیع اللہ جان آن بیدس صحافی عمرچیمہ و صحافی اعزاز سید ہم اوڑدہی کرے۔ بلاول بھٹو زرداری تون اوار فرحت اللہ بابر و سینیٹر مصطفی نواز کھوکھر ہم ساڑی ئسر۔ او وخت آ ہیت وگپ کرسا بلاول بھٹو پارے کہ صحافی حکومت آ تنقید کیر، تو اوفتے نوکری آن کشنگ اُست ہسونی اسے۔ داسہ تو دا فاشسٹ حکومت ویب چینل آتیا حکومتی نااہلی تے بے نقاب کروک آ صحافی تے سگپننگ اٹی ءِ۔ پی ٹی آئی حکومت ہنداخس نزور ءِ کہ صحافی سے نا تنقیدی ٹوئٹ اسے آن ہبکہ مریک۔ کنے اندازہ ءِ کہ دا وخت آ کورٹ بیٹ رپورٹر آک گیشتری حکومت پریشر نا گواچی ءُ۔ پاکستان پیپلزپارٹی ہر دور اٹ میڈیا نا آجوئی کن جنگ تسنے، پاکستان نا میڈیا ورکر آتے نن اسُل تنیا الیپنہ۔

Get real time updates directly on you device, subscribe now.

Leave A Reply

Your email address will not be published.