الس کمک کتو تو کل خواریک پوک مریرہ، بلاول بھٹو زرداری

 اسلام آباد (آن لائن) پاکستان پیپلز پارٹی نا چیئرمین بلاول بھٹو زرداری لاک ڈاﺅن نا دوخت آ الس آن اُراتے ٹی مننگ نا خواست کرسا پارینے کہ اگہ نم 14 دے اکن اُراتے ٹی متویرے و نن تون کمک کتویرے تو ننا کل خواریک زیان مریرہ۔ اسہ ویڈیو کلہو اسے ٹی پاکستان پیپلز پارٹی نا چیئرمین بلاول بھٹو زرداری کورونا وائرس نابابت الس تون ہیت کرسا پارے کہ ای خواست کیوہ کہ نم سندھ حکومت تون کمک کبو‘ اُراٹی مبو و زند انا رکھ ءِ کبو۔او پارے کہ کنے سماءِ کہ اگہ نن کل اسٹ مرین تو کورونا وائرس نا مون ءِ توننگ مریک‘ حکومت اسے نا اہم انگا زمواری تینا الس نا جانجوڑی و زند انا رکھ ءِ۔ بلاول بھٹو زرداری پارے کہ دا وخت آ مچ آ دنیا ٹی کورونا وائرس تالان مننگ اٹی ءِ‘ بندغ آک ناجوڑ و کہنگ اٹی ءُ‘ کورونا وائرس نا تالان مننگ ءِ توننگ و الس نا رکھ اکن سندھ حکومت سخت ءُ فیصلہ کرینے‘ ای خواست کیوہ کہ لاک ڈاﺅن نا فیصلہ غا سندھ حکومت تون کمک کبو۔او پارے کہ کورونا وائرس نا نئے درمان ارے و نئے ویکسین ‘ اگہ لاک ڈاﺅن نا وخت آ نم ناجوڑ مسرے تو سندھ حکومت تون رابطہ کبو تاکہ نما ٹیسٹ کرفنگ مرے۔ چیئرمین پی پی پی پارے کہ کنے سماءِ کہ لاک ڈاﺅن نا وخت آبھاز آبندغ آک فریشان مریرہ کہ او امر گزران کیرہ؟ لاک ڈاﺅن نا وخت آ راشن نا گرج مس تو سندھ حکومت کوشست کیک کہ نمے اسکان راشن سرکننگے۔او پارے کہ ازگار بندغ آتیان خواست کیوہ کہ او غریب آتا خیال ءِ کیر‘ ازگار بندغ آک سندھ حکومت تون کمک کیر تو غریب آتا خیال تخنگ مرے۔ بلاول بھٹو زرداری پارے کہ کنے سماءِ کہ نوکری کروک تپّہ ءِ خلیس مرےک کہ دن مف کہ او لاک ڈاﺅن اٹ بے روزگار مریر‘ سندھ حکومت نے نوٹیفکیشن کرینے کہ لاک ڈاﺅن نا وخت آ کس اس کس ءِ بے روزگار کننگ کپک‘ دا نوٹیفکیشن ہم کرینے کہ لاک ڈاﺅن نا وخت آ ملازم آتے پورو تنخواہ تروئی مریک۔او الس ءِ پارے کہ اگہ ہراڑے نم نوکری کیرے او سندھ حکومت نا فیصلہ ءِ منپننگ ءُ تو نم سندھ حکومت تون رابطہ کبو۔ بلاول بھٹو زرداری صنعت کار و واپاری بندغ آتے پارے کہ لاک ڈاﺅن نا وخت آ اگہ نم ملازم آتے کشپیرے و تنخواہ ایترے تو سندھ حکومت ولدا نم تون ہم کمک کیک۔او داہم پارے کہ سندھ حکومت ہندن ءُ گام گیج ہم کننگ اٹی ءِ کہ او الس ءِ ریلیف ہم رسیفنگ کے‘ نن خواست کینہ کہ بنجائی حکومت دا وائرس نا مون ءِ توننگ کن نن تون کمک کے۔