اسلام آباد اٹ سی ڈی اے نا شاری تے کن موبائل ایپ اینو بنا کیک

اسلام آباد(اے پی پی) وزیراعظم عمران خان چارشنبے نادے آ بنجائی دارالحکومت نا شاری تے اوفتا درگہ غا شاری آسراتی تا فراوانی ءِ پک کننگ کن سی ڈی اے انتظامیہ نا کنڈآن جاری کروک آ پوسکن آ ایپلیکیشن (ایپ) انا بناءِ کیک۔ وزیراعظم نا پارت آ بنجائی دارالحکومت نا شاری تے اوفتا درگہ غا شاری آسراتی تا فراوانی ءِ پک کننگ کن سی ڈی اے انتظامیہ نا کنڈآن پوسکن ءُ ایپ اس درستی راستی کرفنگانے۔ داموبائل ایپلیکیشن نا باقاعدہ بناءِ وزیراعظم عمران خان اینو(چارشنبے نادے آ) کیک۔ داایپ انا رداٹ انفارمیشن ٹیکنالوجی ءِ کاریم اٹ اتساشاری تے 43چندی آسراتی تے آن لائن فراوان کننگ انگ ءِ۔ دا آسراتی تیٹی ای پولیسنگ، ایمرجنسی سروسز، ڈومیسائل، شناختی کارڈ، اراضی فرد، سلہہ لیسن، گاڈی تا رجسٹریشن ، ٹوکن ٹیکسز نا زرتس، ودی و ڈیتھ سرٹیفکیٹ جاری کننگ وایلو چندی آسراتی اوار ءُ۔ داآسراتی ءِ اسلام آباد ایڈمنسٹریشن ، نیشنل انفارمیشن ٹیکنالوجی بورڈ و نادرا نا تین پہ تینی شریداری اٹ فراوان کننگ انگ ءِ۔ آن لائن شاری تا آسراتی تا فراوانی نا مسخت شاری تے سرکاری دفترآتے ٹی چِراٹ سلنگ و مرغن ءُ انتظار اسے نا زحمت آن بچفنگ نا ءِ۔