میڈیا ورکر و صحافیک کورونا نا برخلاف جنگ اٹی کڑد ادا کننگ ءُ، فردوس اعوان

اسلام آباد(اے پی پی) وزیراعظم نا خصوصی کمکار حوالکاری و شین کاری ڈاکٹر فردوس عاشق اعوان الیکٹرانک و پرنٹ میڈیا نا مالک آتے چھٹی اس نوشتہ کرینے ہراٹی صحافی ، کیمرہ مین و میڈیا ورکرز آتا کورونا وائرس نا خطرہ ٹی کسبی باندات آتا انجام تننگ اٹ سلامتی و رکھ ءِ پک کننگ آ چکار مرکوز کرفنگانے۔ وزیراعظم نا خصوصی کمکار حوالکاری و شین کاری ڈاکٹر فردوس عاشق اعوان سے شنبے نادے آ اخباری مالکان آتا تنظیم آل پاکستان نیوز پیپرز سوسائٹی(اے پی این ایس) نا صدر حامد ہارون و الیکٹرانک میڈیا مالکان آتا تنظیم پاکستان براڈ کاسٹنگ ایسوسی ایشن (پی بی اے) نا چیئرمین شکیل مسعودءِ چٹھی اس نوشتہ کرینے ہراٹی پارینے کہ میڈیا ورکرز و صحافیک کورونا نا برخلاف جنگ اٹی ہر اول دستہ نا کڑد ءِ ادا کننگ ءُ۔ میڈیا مالک آتیان خواست ءِ کہ وائرس نا خطرہ ٹی کسبی باندات آتا سر تننگ اٹ تینا ہمو سپاہی تا سلامتی و رکھ ءِ پک کیر۔ اوپارے کہ الس ءِ آگاہی تننگ اٹ میڈیا نا کلیدی ءُ کڑد اسے، اوفتا آسودہی ءِ حکومت اولیت ایتک۔