یوکرائن قرارداد نا منہ ٹِک ننا موقف آن چَپ ئسر، پاکستان

اقوام متحدہ: پاکستان روس و یوکرائن جھیڑہ نا پرامن ایسری کن ہڑتوم آ فریق آتا نیام اٹ مذاکرات نا دُوارہ بناءِ کننگ نا گرج آ زور شاغانے۔ پاکستان روس۔ یوکرائن جنگ ءِ اسہ سال اس پورو مننگ آ اقوام متحدہ نا جنرل اسمبلی ٹی پیش کروک قرارداد آ مروک آ سلاہ درشانی ٹی بشخ ہلتو۔ داوخت آ اقوام متحدہ ٹی پاکستان نا آخبتی مندوب منیر اکرم اقوام متحدہ نا جنرل اسمبلی نا دیوان اٹی روس۔ یوکرائن جھیڑہ نا چٹفنگ نا قرارداد آ سلاہ درشانی ٹی بشخ ہلپننگ نا وضاحت ترسا پارے کہ او دا قرارداد آ سلاہ درشانی ٹی بشخ ہلتو پاریز کرے، ہرانا مسودہ یوکرائن تیار کریسس، شریک سپانسرز نا کنڈ آن جھیڑہ نا شدت اٹی کمتی اتنگ نا کوشست آتیان پد ہم گڑاس شق آک داسہ ہم پاکستان نا اصولی موقف تون مطابقت تخپسہ۔ اوپارے کہ پاکستان وتواجہی، بریبری، وتواجہی و ریاست آتا علاقائی سالمیت نا شرف نا اصولی و دھڑکو یا واک انا کاریم اٹ اتنگ آن علاقہ ءِ دوئی کپننگ نا خواست انا پورو مخ تفی ءِ کیک۔ پاکستانی سفیر پارے کہ واک انا کاریم اٹ اتنگ آن ریاست آتے دوئی کننگ مفک ولے اودے افسوز ءِ کہ درملکی کوزہ نا حالیت و بھارت نا غیر کانودی کوزہ ٹی جموں وکشمیر نا غیر کانودی و زور اٹ اواری نا برجا کوشست آتیٹی دا اصول آتا جہانی کہول آ اطلاق و شرف ءِ کننگتنے۔ اوپارے کہ پاکستان یوکرائن اٹی جوان، انصاف اٹ و دیرپا امن نا دوئی کننگ کن سفارتی کوشست آتیکن تینا مخ تفی ءِ اِرا ہنداخہ پین کننگ کن باسک ملک و جہانی تنظیم آتیان قرارداد نا خواست ءِ ہم پک کیک۔ ہراتم اسکان اشتعال انگیزی برجاءِ، جنگ انا پین فوجی و جغرافیائی وڑاٹ ودنگ نا مدام خطرہ ساڑی ءِ ہرا جہانی امن و سلامتی کن اسہ دمدستی ءُ خطرہ اسے۔ پاکستان مندوب پارے کہ قرارداد نا مسودہ ٹی ساڑی اصول و عمومی شق آتون امنائی و اوفتے پک کرسا گڑاس شق آک پاکستان نا اصول موقف تون مطابقت تخپسہ۔

(اے پی پی)