کوئٹہ ٹی بارکھان واقعہ نا برخلاف برجا دھرنا ءِ چٹفنگ نا پڑو

خواست آک پورو مسنو، صوبائی حکومت ہچ ءُ کمک اس کتو، آئی جی پولیس نا منتوار اُن، مہر دین مری 

0

Get real time updates directly on you device, subscribe now.

کوئٹہ : کوئٹہ ٹی بارکھان واقعہ نابرخلاف دھرنا ءِ چٹفنگ ناپڑو کننگا‘ مری اتحاد نا راہشون مہر دین مری پارے کہ خواست آک پورو مسنو ہندا سوب آن ءِ چٹفنہ۔ میڈیا تون ہیت وگپ کرسا آل پاکستان مری اتحاد نا راہشون مہر دین مری پارے کہ ننا خواست آک پورو مسنو‘ نن دھرنا ءِ چٹفنگ نا پڑو کینہ‘ او پارے کہ ننا ایلو خواست آتے ہم امنا کننگانے۔ صوبائی وزیر عبدالرحمان کھیتران ءِ دزگیر و خان محمد مری نا خاہوت بازیاب مسنے‘ نن تون صوبائی حکومت ہچ ءُ کمک اس کتو‘ حکومت سردار عبدالرحمان کھیتران نا پد اٹ سلوک ءِ‘ نن آئی جی پولیس نا منتواران ہرا ننا بندغ آتے پدی ایس و ایلو خواست آتے امنا کرے‘ لاش تے ڈی این اے کن دننگ انگ ءِ‘ جہہ وجاگہ کننگ نا اوکان پد پڑو کننگک۔ اوپارے کہ گراں ناز و اونا مسڑ ءِ کراچی آ میڈیکل کن دینہ۔ داکان بیدس وزیراعلیٰ بلوچستان میر عبدالقدوس بزنجو خان محمد مری نا برمتہ مروک چناتا حفاظت اٹ بازیابی آ است جمی نا درشانی ءِ کرسا چناتا حفاظت اٹ بازیابی آ کانود نافذ کروک آ ادارہ خاص وڑاٹ لیویز فورس انا کارکڑد انا ستاءِ کرے، تینا جاری کروک بیان اٹی وزیراعلیٰ پارے کہ برمتہ مروک چناتا بابت الس و حکومت اٹی بھاز گڑتی ئسک ہرانا خاتمہ ممکن مس، وزیراعلیٰ صوبائی وزیر داخلہ میر ضیائلانگو ایڈیشنل چیف سیکرٹری داخلہ زاہد سلیم و آئی جی پولیس عبدالخالق شیخ نا کوشست آتا ستاءِ کرے۔ وزیراعلیٰ پارے کہ واقعہ نا بے کنڈ ہلوک جاست وپاست ءِ ہرحال اٹ پک کننگ انگ ءِ۔ اودایخین نا درشانی ءِ کرے کہ ہندا است ہسون واقعہ نا غٹ راستکی و سوب آک زوت مون آ بریرہ و واقعہ نا زموار آتے کانود نا گرفت اٹ ہرحال اٹ اتنگک۔

(آن لائن)

Get real time updates directly on you device, subscribe now.

Leave A Reply

Your email address will not be published.