بنجائی حکومت دہشت گردی نا زہمی تا نسخان تا پوروی کن کمک کیک،وزیر مملکت داخلہ طلال چوہدری

اسلام آباد، وزیر مملکت داخلہ طلال چوہدری پارینے کہ بنجائی حکومت دہشت گردی آن زہمی بندغ آتا نسخان تا پوروی کن پین مالی کمک فراوان کننگ کن تیار ءِ، ولے داڑکن خصوصی آڈٹ رپورٹ آ تعلقدار کمیٹی ٹی شرہ و سفارشات المی ءِ۔ جمعہ نادے آ سینٹ اٹی سینیٹر دوست محمد چکاری نوٹس نا ورندی ءِ ترسا او پارے کہ دہشت گردی آن زہمی ہند آتا نسخان تا سروے بنجائی وڑاٹ پنچ ایجنسی تیٹی کرفنگاسس، ہراٹی کم و ود اسہ لکھ 44 ہزار ہند آتا سروے ءِ کننگا۔ دافتے ٹی 66 ہزار 989 ہندآتے زیات وخت اس کہ 3 ہزار 875 ہند آتے نیمہ نسخان رسینگ نا پیدواری ءِ کننگا۔ وزیر مملکت پارے کہ اوکان گڈ شاری نسخان تا پوروی نا پروگرام نا رداٹ معاوضہ غاتا زرتننگ کن سروے نا درستگی آ اعتراض آک مون آ بسر، اوکان پد سویلی وزیرستان اٹی دُوارہ سروے کرفنگا۔ او پارے کہ اولیکو سروے ٹی سویلی وزیرستان نا 27 ہزار 107 ہندآک اوار ئسر، وخت اس کہ دُوارہ سروے ٹی دا کچ ودسا اسہ لکھ 13 ہزار 716 مس۔ او پارے کہ معاوضہ غاتا زرتا تننگ کن نسخان نا وڑ انا رداٹ وڑوڈول اس پک کننگاسس، ہرا نا رداٹ پورو یا زیات نسخان والا ہند آتے کن چار لکھ روپئی وخت اس کہ کم نسخان والا ہند آتے کن یک و نیم لکھ روپئی پک کننگاسس۔ طلال چوہدری پارے کہ بنجائی حکومت 2014 آن 2021 اسکان زہمی تے معاوضہ نا زر آتے تس و دامسخت کن جم وڑاٹ 117 ارب روپئی بشخنگا۔ اوکان گڈ صوبائی حکومت نا کمکاری اٹ خصوصی آڈٹ کرفنگا و آڈٹ پورو مننگ اسکان پین زر آتا بشخنگ نا توننگ ناپارت کننگا۔ او پارے کہ آڈٹ رپورٹ نا بابت محکمانہ اکاؤنٹس کمیٹی نا اسہ دیوان اس پین سلوک ءِ، اوکان گڈ رپورٹ سیفران کمیٹی ٹی پیش کننگک۔ ہندا کمیٹی پین زرتننگ آن مست آڈٹ کرفنگ نا پارت کریسس۔ وزیر مملکت پارے کہ خیبر پختونخوا ءِ دہشت گردی تون مون تننگ کن این ایف سی نا رداٹ اسہ درسد ودکی بشخ ہم فراوان کننگک، ہرا ایلوصوبہ غاتا بشخ آتیان جتاءِ۔ اونا رداٹ دامد اٹ کم و ود ہشت ارب روپئی مہالو آن فراوان کننگانے۔ او پیدوار کرے کہ بنجائی حکومت زہمی تا کمک کن پین زرفراوان کننگ آ امنائی ءِ و آڈٹ رپورٹ آ سیفران کمیٹی نا کنڈآن موکل ملنگ آن پد دارداٹ پیشرفت کننگ مریک۔