پی ٹی آئی و عمران خان سازش نا ر داٹ ملک ءِ بھس کریر، مولانا حیدری
لس گچین کاریک وخت آ مریرہ، ہشت اگست اسکان دا حکومت و اسمبلیک پنرہ، سیکرٹری جنرل جے یو آئی
قلات : جمعیت علماء اسلام نا جنرل سیکرٹری سینیٹر مولانا عبدالغفورحیدری پارینے کہ لس گچین کاریک وخت آ مریرہ و ہشت اگست اسکان حکومت بنک‘ قران پاک نا پدریسہ بے شرفی آ کل اسلامی ملک آک بایدے سویڈن نا سفیرتے کشر‘ 9 مئی نا واقعہ غاتے پی ٹی آئی و عمران خان پلاننگ اٹ کریر‘ اوفتے شہید آتا یاتگار آتا بے حرمتی آ بایدے سزا رسینگے‘ نن مہالو آن پارسا بسونن کہ عمران خان یہودی ایجنٹ و قادیانی تا کمکار ءِ‘ اسرائیل ناکنڈآن تینا باندات آتے ٹی نیام تمنگ ءِ سگپنہ‘ اقوام متحدہ بایدے دانا نوٹس ءِ ہلے‘ پی ٹی آئی نا آخبت داسہ ئی آن تارمہ ءِ گچین کاری تیان پد پی ٹی آئی نا پن ہم سلپک‘ پی ٹی آئی ٹی کل مانگہ تانگہ بندغ آک ئسر ہرا داسہ بال کرسا ہننگ اٹی ءُ‘ عمران خان نا بابت ننا گڑتیک وخت اتون اوار درست پک مننگ اٹی ءُ۔ دا خیال آتا درشانی ءِ او تینا ہنکین قلات اٹ صحافی تتون ہیت وگپ کرسا کرے‘ اوپارے کہ اومیت کینہ کہ گچین کاریک وخت آ مریرہ‘ 8 اگست اسکان کل اسمبلیک پنرہ‘ او پارے کہ منہ دے مست اسرائیل ناکنڈآن پاکستان ناتہہ انا باندات آتے ٹی نیام تمنگ نا مذمت ءِ کینہ و بایدے اقوام متحدہ دا وڑ انا گام گیج آتا نوٹس ءِ لے‘ پاکستان اسہ آجو و وتواجہ ءُ ملک اسے وتینا فیصلہ غاتے تینٹ جوان وڑ اٹ کننگ کیک‘ اسرائیل ناکنڈآن دا وڑ انا بیانک ننا ملکی فائدہ غاتے ٹی نیام تمنگ آنبار ءُ دانا اخس کہ مذمت ءِ کننگے کم ءِ۔او پارے کہ سویڈن اٹ قرآن پاک نا بے شرفی نا واقعہ نا مذمت ءِ کینہ‘ دیکی دنیا پد ریسہ دا وڑ انا کاریم کرسا مسلمان تا غیرت وحمیت ءِ چیلنج کننگ اٹی ءِ‘ نن خواست کینہ کہ دیکی دنیا خاص وڑ اٹ سویڈن آن تیل وایلو واپاری و سفارتی تعلقداری تے چٹفنگے۔
(آن لائن)