کرپشن مقدمہ غاتا فیصلہ ٹی تل وَل نا زموار نیب ءِ، چیف جسٹس

اسلام آباد (آن لائن) سپریم کورٹ کرپشن مقدمہ غاتا فیصلہ غاتیٹی تل وَل نا زموار نیب ءِ پن کرسا پارینے کہ نیب پرسجوئی افسر آتیٹی بود و لائخی اف، چیئرمین نیب لاکھڑا پاور پلانٹ جوڑ کننگ اٹ وڈی خوری نا پرسجوئی ٹیم ءِ بدل کننگے۔ دا ریمارکس چیف جسٹس لاکھڑا پاور پلانٹ نا جوڑ کننگ اٹ اڑانگ اتنگ نا بابت کیس انا سماعت نا وخت آ تس۔ چیف جسٹس پارینے کہ نیب انا پرسجوئی افسر تیٹی لائخی نا کاختی ءِ، پرسجوئی افسر تے کانودی وڑ تا سما اف، جاست پاست آک سال تا سال سلرہ، بندغ آک سال تا سال نیب اٹ اختہ مریرہ، 30 دے اٹ فیصلہ نا جاگہ غا بندغ آک 30 سال اسکان انتظار کرسا کیرہ، نیب انا ریفرنس نا بنداو آ رد مریک، ریفرنس اٹ کوالٹی مفک، نیب ریفرنس اٹ پنجا پنجا گواہ جوڑ کیک، سزا ترفنگ کن کوالٹی نا اسہ گواہ اس کافی مریک، پراسیکیوٹر جنرل نیب کل دوبہ غاتے عدالت آتیا خلک، راستکی دادے کہ ننے ہچ ءُ کمک اس رسینگپک، حقائق و لیگل پلو آتا ننے سما مفک، پراسیکیوٹر جنرل نیب او وخت آ موقف تس کہ جاست پاست نا پوروی آن مست دزگیری نا ویل چیئرمین نا نوٹس اٹ اتیوہ، حکومت اپوزیشن میڈیا کل نیب انا پد اٹ تموک ءُ، چیئرمین نیب و پراسیکیوٹر آتے دھڑکو رسینگ انگ ءِ، سپریم کورٹ او وخت آ 120 پُوسکن ءُ احتساب عدالت آتا جوڑ کننگ نا منظوری ہلنگ نا پارت کرسا سیکرٹری کانود ءِ کابینہ آن منظوری ہلسا اسہ تُو اسے ٹی جج تعیناتی نا عمل ءِ بنا کننگ نا پارت ہم جاری کرینے۔ عدالت عظمیٰ پُوسکن آ احتساب عدالت آتیکن انفراسٹرکچر ہم جوڑ کننگ نا پارت کرسا نیب ءِ اسہ تُو اسے ٹی رول جوڑ کرسا پیش کننگ نا پارت ہم تننگانے۔ اوکان گڈ پرمان ہم کرینے۔ کیس انا سماعت ءِ تُو اسے کن ملتوی کننگا۔