کلبھوشن یادیو، بھارتی پائلٹ، احسان اللہ احسان ءِ این آراو تننگانے، بلاول

اسلام آباد (آن لائن )پاکستان پیپلزپارٹی نا چیئرمین بلاول بھٹو زرداری پارینے کہ وزیراعظم عمران خان چڑہ ہندا پارینے کہ او کس اسے ہم این آر او تفک ولے عمران خان بھارتی جاسوس کلبھوشن یادیو، بھارتی پائلٹ، دہشتگرد احسان اللہ احسان و ملک انا میگا کرپشن اٹ اختہ انگا بندغ آتے این آراو تسنے، پی ٹی آئی حکومت ءِ کلبھوشن یادیو ءِ کسر تننگ کن مئی ٹی اسہ آرڈیننس اس ایس ہرادے پارلیمنٹ، قومی اسمبلی نا باسک و پاکستانی اُلس آن ڈکنگا، حکومت پائے او اسہ بھارتی جاسوس کلبھوشن یادیو ءِ این آراو انتئے تننگ خواہک وخت اس کہ او تینٹ پاکستان اٹ دہشتگردی کننگ نا اعتراف کرینے۔ قومی اسمبلی ٹی تران کرسا او پارینے کہ داکان مست بھارتی پائلٹ ہرا پاکستان آ جلہو کریسُس اودے چا تننگ آن پد بھارت نا حوالہ ٹی کننگا۔ بلاول بھٹو زرداری پارینے کہ عمران خان کل آن بھلا دہشتگرد احسان اللہ احسان ءِ این آراو تس و اودے یلہ کرسا ملک آن پیشن ہننگ نا موکل ہم تس۔ او پارینے کہ احسان اللہ احسان دنا حراست آن فرار مس۔ او ہراتم فرار مس و امر فرار مس؟ او حکومت دا وخت اسکان اودے پدی اتنگ کن انت گام گیج کرینے؟او پارینے کہ ہراتم ای عمران خان آ تنقید کیوہ، عمران خان نا برخلاف پریس کانفرنس کیوہ و اسمبلی اٹ عمران خان نا برخلاف ہیت کیوہ تو احسان اللہ احسان عمران خان نا مخ تفی ٹی مون آ بریک او کنے دھڑکو ایتک۔ بلاول بھٹو زرداری پارینے کہ عمران خان نا ہر وخت دہشتگرد آتون گٹھ جوڑ ارے ہرا داسکان کن برجا ءِ۔ ہراتم پیپلزپارٹی نا حکومت سوات و سویلی وزیرستان اٹ دہشتگرد آتا برخلاف آپریشن کریکہ تو عمران خان دہشتگرد آتا مخ تفی ءِ کریکہ۔ عمران خان ہر وخت دہشتگرد آتا مخ تفی ءِ کرینے و داسہ ہم دہشتگرد آتون ملوک ءِ۔ او داسہ ہم دہشتگرد آتون ملانو۔