سرکاری ملازم آک دفتر تے ٹی تینا حاضری تے پک کیر‘سہیل الرحمن بلوچ

لورالائی (خ ن)کمشنر ژوب ڈویژن سہیل الرحمن بلوچ پارینے کہ سرکاری ملازم آک دفتر تے ٹی تینا حاضری تے پک کیر‘ اُراتے ٹی تولوک افسر وکارندہ غاتے تنخواہ تننگ کپنہ‘ سرکاری ملازم آک تینا حاضری ءِ پک کیر یا ملازمت ءِ الر‘ غیرحاضر کارندہ غاتا برخلاف سخت کانودی کارروائی کننگک۔ دا خیال آتا درشانی ءِ او لورالائی بائٹمز و ڈائریکٹر ایجوکیشن نا دفتر نا اناگت دورہ ءِ کننگ نا وخت آ کرے‘ لورالائی بائٹمز نا درگہ غاتیا کلف خلوک ئس‘ ڈائریکٹر تون اوار غٹ کارندہ غاک غیب ئسر‘ ہندا وڑ ڈائریکٹر ایجوکیشن نا ہم ڈائریکٹر تون اوار کارندہ غاک غیرحاضرئسر‘ دا وخت آ کمشنر ژوب ڈویژن ترند مس و پارے کہ بندغ آتا تعلیم ناباندات ہچ ءُ ڈیوالئی اس سگپنہ‘ غیر حاضر افسر وکارندہ غاتا برخلاف کانودی کارروائی نا پرمان کرسا اوفتا تنخواہ تے کاٹ کننگ نا پرمان کرے۔کمشنر ژوب ڈویژن تون ڈویژنل فوکل پرسن ڈاکٹر فرحان، ڈویلپمنٹ آفیسر ڈاکٹر اللہ دتہ، ڈسٹرکٹ آئی ٹی آفیسر حکیم خان، محکمہ انفارمیشن محمود بلوچ وایلو افسر آک تُد ئسر۔ کمشنر ژوب ڈویژن سہیل الرحمن بلوچ پارے کہ ڈویژن نا غٹ ضلع غاتے ٹی سرکاری دفتر آتے فعال کننگک۔