پیپلزپارٹی کشمیری تا وتواجہی حق انا مخ تفی ءِ برجاتخک‘ خیرمحمد ترین

کوئٹہ: پاکستان پیپلزپارٹی کوئٹہ ڈویژن نا صدر خیرمحمد ترین پارینے کہ پاکستان پیپلزپارٹی نا چیئرمین بلاول بھٹو زرداری نا کشمیر آ جیرت مندانہ موقف و پاش آن پاش کشمیری الس نا حق خودارادیت نا مخ تفی ءِ کننگ آن بھارت بوکھلاہٹ نا گواچی مسنے، چین، ترکی و ایلو ملک آک مقبوضہ کشمیر اٹی مروک آ جی 20 کانفرنس اٹی بشخ ہلسا پک کرینو کہ او کشمیری الس تون تفوک ءُ۔ اوپارے کہ کشمیری الس اقوام متحدہ نا قرارداد آتا رداٹ حق خودارادیت کن جہد کرسا بننگ ءِ و داجہد اٹی داتم اسکان لکھ آ کشمیری الس تینا جون تے ندر کرینو بھارت مقبوضہ جموں وکشمیر اٹی لکھ آتا کچ اٹی فوجی تعینات کرینے بھارتی فوج کشمیری تیا ظلم انا زی آ ظلم کرینے اوکان پد ہم بھارتی فوج کشمیری تا حق خودارادیت نا توار ءِ توننگ اٹ پورو وڑاٹ بے سہب مسنے۔ اوپارے کہ پاکستان پیپلزپارٹی اولیکو دے آن تینا کشمیری ایڑھ ایلم تا حق خودارادیت ن امخ تفی ءِ کرسا بننگ ءِ، و پاکستان پیپلزپارٹی نا چیئرمین بلاول بھٹو زرداری مقبوضہ کشمیر نا ویل ءِ جہانی وڑاٹ تالان کرینے۔ اوپارے کہ پاکستان پیپلزپارٹی نا چیئرمین و وزیرخارجہ بلاول بھٹو زرداری نا کنڈآن کشمیر نا ویل آ جیرت مندانہ موقف بھارتءِ بوکھلاہٹ نا گواچی کرینے و بھارت چمبازی کننگ ءِ۔ اوپارے کہ پاکستان پیپلزپارٹی تینا کشمیری ایڑھ ایلم تا حق خودارادیت نا مخ تفی ءِ برجاتخک۔

(اے پی پی)