عثمان بزدار نا عبوری ضمانت اٹی 25 مئی اسکان ودکی
Get real time updates directly on you device, subscribe now.
لاہور: لاہور نا احتساب عدالت کٹیا غان زیات میرات آتا انکوائری و کال اپ نوٹس نا باندات اٹی مسکوہی وزیراعلیٰ پنجاب عثمان بزدار نا عبوری ضمانت اٹی 25 مئی اسکان ودکی کرسا اونا اسہ دے انا حاضری معافی نا درخواست ءِ منظور کرے۔ احتساب عدالت نا جج سجاد احمد شیخ تحریک انصاف نا باسک عثمان بزدار نا درخواست ضمانت آ سماعت کرے۔ سے شنبے نادے آ سماعت آ عبوری ضمانت نا معیاد چٹنگ آ عثمان بزدار اسہ وار ولدا عدالت اٹ پیش متو، عثمان بزدار نا وکیل آک حاضری معافی نا درخواست دائر کرسا عدالت ءِ پاریر کہ عثمان بزدار ءِ سینہ ٹی دڑد انا شکایت ءِ۔ ہراڑا فاضل جج ریمارکس تس کہ عثمان بزدار ءِ پیش مننگ نا آخیریکو موقع تننگ اُن، اگہ بروک آ سماعت آ دوبہ دار پیش متو تو ضمانت ءِ خارج کننگک۔ فاضل جج انا ریمارکس آن پد وکیل عثمان بزدار پارے کہ عدالت نا پارت آ کیس انا بابت ورندی تے نیب آفس اٹ جمع کرفینن۔ عدالتی اَرفنگ آ نیب جاست وپاستی آفیسر پارے کہ عثمان بزدار سال 2000آن 2017 اسکان جوڑ کروک آ میرات نا بابت سوج آتا ورندی ءِ تتو، عثمان بزدار بیرہ سال 2018 آن 2022 اسکان جوڑ کروک آ جائیداد آتا ورندی ءِ تس، دوبہ دار عثمان بزدار وزیراعلیٰ جوڑ مننگ آن مست تحصیل ناظم ہم رہینگانے و کٹیا غان زیات میرات جوڑ کرے۔ احتساب عدالت نا فاضل جج ریمارکس تس کہ عثمان بزدار ءِ عدالت اٹ پیش مننگ نا آخیریکو موقع تننگ اُٹ۔ عدالت عثمان بزدار نا عبوری ضمانت اٹی 25 مئی اسکان ودکی کرے۔
(اے پی پی)