بانی پی ٹی آئی نا درمان نا باندات عملدرآمد مننگ ءِ‘عطا تارڑ

اسلام آباد، بنجائی وزیرِ حوالکاری و شینکاری عطا تارڑ میڈیا تون ہیت وگپ کرسا پارینے کہ بانی پی ٹی آئی نا درمان نا بابت انتظامیہ عدالتی پارت آ پورو وڑ اٹ عملدرآمد کرے۔ او پارے کہ عدالت پاش وڑاٹ پاریسس کہ بانی نا درمان نا وخت آ ہچ ءُ بیان بازی اس مفک، ولے داکان پد ہم میڈیا ٹاک کننگا، سیاست ہم مس، بیان بازی بھی برجا سلیس و سیکورٹی ٹی ہم اڑاند شاغنگا۔ او پارے کہ عدالتی فرمان نا رِد اٹ کل کانودی المی آسراتی تے پورو کننگا، ولے پی ٹی آئی نا کنڈ آن بے بنداو توہینِ عدالت نا درخواست دائر کننگانے۔ او پارے کہ اسہ توہینِ عدالت تو ہمو وخت مس ہراڑے شفا ہسپتال نا پیشن آبندغ آتے ٹولی تا وڑ اٹ مچ کننگا۔ عدالت پارت کریسس کہ سیاسی بیان بازی کننگ مفک، ہندا سوب آن بانی پی ٹی آئی، اونا خاہوت و پارٹی توہین عدالت کرینو۔ بنجائی وزیر مستی پارے کہ بانی پی ٹی آئی نا ایڑھ و اونا پارٹی عدالتی پارت آتیان چَپ کارروائی کریر، پی ٹی آئی عدالتی پرمان ءِ امنا کتو و تینا جند انا باور کرفنگ آن چَپ کاریم کرے۔ حکومت اولسرجاچ اپیل اٹی کل بندی تیکن بریبر آسراتی تا بابت سوج چست کرے و بھاز شرف اٹ سوج کرے کہ مگہ دا وڑ انا آسراتی جیل اٹی بند کل بندی تے دوئی ارے۔