سخت تنقید نا گواچی مننگ آن پد جاوید میانداد وزیراعظم عمران خان آن بشخنداری خواہس

لاہور (مانیٹرنگ ڈیسک) سخت تنقید نا گواچی مننگ آن پد پاکستانی کرکٹ ٹیم نا مسکوہی گوایز گر و مسکوہی کیپٹن جاوید میانداد وزیراعظم عمران خان آن معذرت کرے۔ حوال نا رداٹ منہ دے مُست مسکوہی کرکٹر تینا یوٹیوب چینل آ ہیت کرسا مسکوہی کیپٹن او پی سی بی نا چیف پیٹرن آ ملکی کرکٹ ءِ بھس کننگ نا دوبہ خلکوسُس۔ داسہ تدوک آ دے تینا اسہ انٹرویو سے ٹی او پارینے کہ کنا ہیت آن اگہ کس اسے نا اُست ہسون مسنے تو اوڑان او خاص کر وزیراعظم عمران خان آن معذرت کیوہ، قومی ٹیم نا انگلینڈ اٹ کارکڑد آ سوختہ ئس، ہندا سوب آن دا ہیت ءِ کریٹ، عمران خان و پاکستان کرکٹ نا ہروک آتا بھاز عزت ءِ کیوہ۔ یات سلے کہ جاوید میانداد نا ایڑ انا مار فیصل اقبال ءِ ہندا منہ وخت اٹ پی سی بی ڈومیسٹک ٹیم نا ہیڈ کوچ گچین کرینے۔