محمد یوسف ہائی پرفارمنس سینٹر اٹ بیٹنگ کوچ گچین

لاہور (مانیٹرنگ ڈیسک) پاکستان کرکٹ بورڈ (پی سی بی) ہائی پرفارمنس سینٹر اوصوبائی ٹیم تے کن کوچ شارٹ کننگا۔ برطانیہ ٹی رہنگوک آ محمد زاہد باؤلنگ کوچ، عتیق الزمان وکٹ کیپنگ کوچ مننگ کیک، مسکوہی کیپٹن محمدیوسف ہائی پرفارمنس سینٹر اٹ بیٹنگ کوچ نا زمواری تے پورو کیک۔ مسکوہی ٹیسٹ آل راؤنڈر عبدالرزاق ورنا آل راونڈر تا راہشونی ءِ کیک وخت اس کہ باسط علی، غلام علی ہم کوچ آتا لسٹ انا بشخ ءُ۔ مسکوہی کرکٹر آک کوچنگ زمواریک طے مسنو وخت اس کہ تعیناتی مالی معاملہ و ایلو شڑت آتون گنڈوک ءِ۔ محمد زاہد نیوزی لینڈ نا برخلاف ڈبیو ٹیسٹ اٹ 11 گوازی گر تے آؤٹ کروک آ اسٹ انگا پاکستانی پیسر ءِ او 5 ٹیسٹ او یانزدہ اسہ دے ئی میچ آتیٹی ملک انا نمائندگی ءِ کرے۔ مخ انا ناجوڑی نا سوب آن محمد زاہد نا کیریئر گونڈ مس، 44 سال نا محمد زاہد اینو پگہ بولٹن اٹ کوچنگ نا زمواری تے پورو کننگ اٹی ءِ، او ہائی پرفارمنس سینٹر اٹ ورنا باؤلر تا راہشونی ءِ کیک۔ اسہ ٹیسٹ و مسہ ون ڈے میچ گوازی کروک آ عتیق الزمان اینو پگہ لنکا شائر ویمنز ٹیم تون کاریم کننگ اٹی ءِ، ایلو کنڈ آ فاسٹ باولر شعیب اختر بولنگ کوچ نا دا عہدہ ٹی اُست خواہی نا درشانی ءِ کتو وخت اس کہ بیٹنگ کوچ اکن محمد یوسف و آل راونڈر تے کن مسکوہی ٹیسٹ کرکٹر عبدالرزاق ءِ زمواری تننگ آ امنائی نا درشانی ءِ کرے، ایلو مسکوہی کرکٹر تے صوبائی ٹیم تتون کاریم کننگ نا وارخواہی تننگ انگ ءِ۔