مچ آ صوبہ ٹی بی آر سی نا طالبعلم آتا پوزیشن ہلنگ ستا کڑزک‘ آصف فراز مستوئی

لورالائی :  میٹرک نا سالانہ امتحان اٹ مچ آ بلوچستان اٹ اولیکو 29 پوزیشن ءِ دوئی کروک آ بی آر سی لورالائی نا طالبعلم آتے ایس ایس پی لورالائی آصف فراز مستوئی نا کنڈآن ایس ایس پی ہاوس لورالائی ٹی ستائی سرٹیفییکٹ و چائے پارٹی تننگ نا دود اس اڈ ہلک۔ دود بی آر سی نا طالبعلم و استاد پرنسپل بی آر سی لورالائی عبدالصمد اچکزئی نا کماشی ٹی ایس ایس پی ہاوس لورالائی ءِ سر مسر۔ ایس ایس پی لورالائی آصف فراز مستوئی، اسسٹنٹ کمشنر لورالائی ظہور بلوچ، ڈسٹرکٹ چیئرمین اصغر خان اوتمانخیل طالبعلم و استاد آتے بخیر کرے۔ دود آن ایس ایس پی لورالائی آصف فراز مستوئی، ڈسٹرکٹ چیئرمین اصغرخان اوتمانخیل، اسسٹنٹ کمشنر ظہور بلوچ، پرنسپل بی آر سی لورالائی صمد اچکزئی، اسک تران کریر۔ ڈسٹرکٹ چیئرمین اصغر اوتمانخیل نا کنڈآن جوان کارکڑد نشان تننگ آ بی آر سی انتظامیہ و پوزیشن ہلوک آتے نقد لکھ روپئی تننگ نا پڑو ءِ کرے۔ گڈ سر اٹ ایس ایس پی لورالائی آصف فراز مستوئی نا کنڈآن پوزیشن ہولڈر طالبعلم آتے محکمہ پولیس نا کنڈآن ستائی سرٹیفکٹ، و استاد آتے شیلڈ تس۔ دود اٹ بشخ ہلوک آ مہمانک ڈسٹرکٹ چیئرمین اصغر خان اوتمانخیل، اسسٹنٹ کمشنر ظہور بلوچ، ڈی ایس پی کریم مندوخیل، ٹریفک انچارج شریف موسی خیل عزیز اللہ ناصر، آغا جان بی آر سی طالبعلم و استاد صاحب آتیا شیلڈ بشخ و پانٹ کرے۔ دود آن تران کرسا ایس ایس پی آصف فراز مستوئی پارینے بی آر سی نا طالبعلم آک پوزیشن دوئی کرسا ملک و قوم انا پن ءِ روشن کریر۔ پد سلوک آ صوبہ نا پوزیشن ہلنگ اوفتا استاد آتا خواری و لمہ باوہ نا دعا تا بدلہ ءِ۔

(آن لائن)