پوریاگرک بلوچستان اٹ وارخواہی تیان فائدہ ہرفر، ملک ولی کاکڑ

کوئٹہ : گورنر بلوچستان ملک عبدالولی خان کاکڑ کراچی شار اٹ فیڈریشن آف پاکستان چیمبرز آف کامرس اینڈ انڈسٹری (FPCCI) نا کنڈآن ایکسپورٹ ایوارڈ ونرز نا بابت اٹ اڈ ہلوک دود انا بشخندار آتیان تران کرسا پارینے کہ داٹی ہچ ءُ شک اس اف کہ پاکستان نا بزنس کمیونٹی ہر وخت پاکستان کن خدمت کننگ اٹی ءِ۔ صنعت و واپاری تون گنڈوک واپار آک مچ آ دنیا ٹی ننا سلاہکار آک پاننگرہ۔ نم پاکستان نا زرگزرانی شونداری ٹی جوان ءُ کڑد اس ادا کیرہ۔ گورنر بلوچستان کراچی ٹی آل پاکستان نا ایکسپورٹ ایوارڈ ونر آتے تینا کنڈآن و بلوچستان نا اُلس نا کنڈآن اُست اٹ مبارکبادی تس۔ او وخت آ گورنر سندھ محمد کامران خان ٹیسوری، گورنر خیبر پختونخوا حاجی غلام علی، صدر فیڈریشن آف پاکستان چیمبرز آف کامرس اینڈ انڈسٹری عرفان اقبال شیخ، مسکوہی صدر FPCCI میاں انجم نثار سینئر نائب صدر سلیمان چاولہ صاحب تون اوار صنعت و واپاری تون گنڈوک بندغ آتا اسہ بھلو کچ اس ساڑی ئس۔ بشخندار آتیان تران اٹ گورنر بلوچستان پارینے کہ بلوچستان اٹ واپاری و سرمایہ کاری نا جوان ءُ وارخواہی ساڑی ارے۔ المی ءِ کہ نم کل دا درکار آ وارخواہی تیان فائدہ دوئی کبو۔ داڑان بیدس صوبہ بلوچستان مچ آ ملک انا صنعتکار و واپار آتے سینٹرل ایشیا اسکان سر کننگ کیرہ۔ دا کوشست آتیٹی نما ادارہ FPCCI جوان کمک فراوان کننگ کیرہ۔ او پارینے کہ ننتون FPCCI نا وڑاٹ اسہ ادارہ اس ساڑی ءِ۔ ساڑی زرگزرانی نظام ءِ نم مستحکم جوڑ کیرہ۔ گڈسراٹ گورنر بلوچستان ملک عبدالولی خان کاکڑ کل ایکسپورٹ ونر آتے مبارکباد پیش کرسا ایکسپورٹ ایوارڈ ونر و منتظم آتیٹی یات گاری شیلڈ بشخ وپانٹ کرے و اوفتے پام تس کہ FPCCI بلوچستان اٹ داوڑ نا دود اڈ تننگ اٹ گورنر ہاوس کوئٹہ نا کمک نم تون اوار ءِ۔

(آن لائن)