نیب کانود آتیٹی بدلی کن پارلیمانی کمیٹی نا سلاہ

0

Get real time updates directly on you device, subscribe now.

 اسلام آباد(آن لائن ) ایوان بالا ٹی اپوزیشن و حکومتی باسک آک نیب کانود اٹ بدلی تا بابت پارلیمنٹ نا اسیجائی کمیٹی اس تشکیل تننگ نا گرج انا پارینے۔ باسک آک پارینو کہ سپریم کورٹ نا کنڈآن نیب نا بابت اٹ فیصلہ غان پد وخت بسنے کہ پارلیمان تینا تاریخی آ کڑد ءِ ادا کیر، باسک آک ملک اٹ ساڑی تاریخی مجسمہ غاتے نسخان تروک آتا برخلاف کارروائی نا ہم خواست کرینے۔ تدوک آ دے سینیٹ دیوان اٹی اُلسی اہمیت آ ہیت کرسا سینیٹر محمد اکرم پارینے کہ بھاز آک بدھا نا مجسمہ ءِ نسخان تننگ نا کسر ءِ ہلکنو دا ننا متکن آ تہذیب آک ءُ، اوفتے بچفنگ و نسخان آن رکھنگ نا گرج ءِ، او پارینے کہ اسہ خاص ءُ سوچ ہرا ننا سوسائٹی ٹی ساڑی ءِ او اوفتے نسخان تننگ نا کسر آٹے۔ اوپارینے کہ نبی پاک آن ہلیس خلیفہ غاتسکان او اوفتے آن پد انا دور اٹ ایلو مذہب آتا احترام ءِ کننگانے او پارینے کہ دا ڈغار آ کیہی دورک گدرینگانو او ہر دور اٹ ایلو مذہب آتا احترام ءِ کننگانے ولے اوغانستان اٹ طالبان نا دور اٹ بامیان اٹ بدھا نا مجسمہ غاتے بھاز نسخان تننگا او پارینے کہ دا مجسمہ غاتیان کس اسے ہچ ءُ نسخان اس رسینگپک، دافتے بایدے نسخان تننگ آن بچفنگے۔ سینیٹر میر کبیر محمد شہی پارینے کہ پنجاب یونیورسٹی اٹ بلوچستان آن تعلق تخوک آ طالبعلم آتا خصوصی آ سیٹ آتے 106 آن کم کرسا 55 کننگانے او پارینے کہ مروئی دا ئس دا سیٹ آتیٹی پین ودکی کننگے ولے داٹی کمتی کننگانے او پارینے کہ اولیکو بلوچستان اٹ یخ انا مُد اٹ گیس انا ویل مریک او جتا جتا علاقہ غاتیان اُلس ءِ ویل آک مون تروک مریرہ ہراڑا چیئرمین ہڑتوم آ معاملہ غاتیا ہمو صوبائی حکومت آتیان ادارہ غاتتون ہیت کننگ نا پارت کرے۔ سینیٹر کلثوم پروین پارینے کہ بھاز آ ویل آتیا سوشل میڈیا آ کنا و کنا مسڑ نا برخلاف سٹی ءُ پروپیگنڈہ کننگانے ہراڑا چیئرمین سینیٹ معاملہ نا نوٹس ءِ ہلسا ہمو کمامدار آتیان رپورٹ بٹنگانے، سینیٹر سراج الحق پارینے کہ مقبوضہ کشمیر اٹ ہندوستان نا ریاستی دہشت گردی برجا ءِ، او مقبوضہ کشمیر نا ڈغار تیا کوزہ نا کوشست کننگ انگ ءِ، او پارینے کہ مقبوضہ کشمیر نا مچ آ کماش آک دا وخت آ جیل آتیٹی ءُ، حکومت ءِ 5اگست آ یوم مذمت نا وڑاٹ اڈ تننگ نا پڑو کننگے تانکہ کشمیری تا اُست خواہی مرے وخت اس کہ اوفتا جہد ءِ آجوئی ءِ پین طاقت رسینگے۔

Get real time updates directly on you device, subscribe now.

Leave A Reply

Your email address will not be published.