بلوچستان اٹ توانائی نا بدل گیگ نا بابت پالیسی اس جوڑ کننگ نا فیصلہ

کوئٹہ ( خ ن) وزیراعلیٰ بلوچستان جام کمال خان نا کماشی ٹی اڈ ہلوک بڑزکو کہولی دیوان اٹی محکمہ توانائی نا کارکڑد آن بیدس صوبہ ٹی توانائی نا بدل گیگ نا شونداری و دا بشخ اٹی زرکاری نا شون تننگ نا بابت باندات آتا جاچ ءِ ہلنگا، و دا رد اٹ اسہ جامع پالیسی اس شین تننگ نا فیصلہ کننگا۔ دیوان اٹی بلوچستان انرجی کمپنی لمیٹڈ و بلوچستان پاور ڈویلپمنٹ بورڈ ءِ دمدستی فعال کننگ نا فیصلہ ہم کننگا، داڑکن محکمہ توانائی ءِ المی گام گیج نا پارت کننگا، سیکرٹری محکمہ توانائی شہریار تاج دیوان ءِ تعلقدار باندات آتا بابت بریفنگ تس۔ پارلیمانی سیکرٹری توانائی مبین خان خلجی، ایڈیشنل چیف سیکرٹری ڈٹ بندی و شونداری عبدالرحمن بزدار، اسپیشل سیکرٹری محکمہ خزانہ لعل جان جعفر و ایلو تعلقدار کمامدار آک دیوان اٹ ساڑی ئسر۔ دیوان نا وخت آ گپ و تران کرسا وزیراعلیٰ پارے کہ ایلو بشخ آتیانبار بلوچستان اٹی توانائی نا بشخ اٹی شونداری و زرکاری نا بے کچ گیگ ارے۔ اللہ تعالیٰ بلوچستان ءِ توانائی نا بدل گیگ آتیان ہم شُپ کرینے، ہرافتے شون ترسا کاریم اٹ اتنگ آن نئے بیرہ بلوچستان بلکن مچ آ ملک انا توانائی نا گرج آتے پورو کننگ مریک۔ و صوبہ نا وسیلہ غاتیٹی ہم ودکی مریک۔ وزیراعلیٰ پارت کرے کہ غٹ محکمہ غاتیٹی تینا زرکار پالیسی تے پیدوار کننگے، ہراڑان زرکار آتا راہشونی مننگ کے و محکمہ غاک تینا زرکار پالیسی و گائیڈ لائن آتے تینا ویب سائٹ نا کمک اٹ مون آ اتیر۔ وزیراعلیٰ محکمہ ڈٹ بندی و شونداری ءِ کنسلٹنٹ دوئی کرسا غٹ محکمہ غاتا زرکار پالیسی تا اول سر جاچ ہلسا رپورٹ ٹہیفنگ نا پارت کرے۔ ہرادے مون آ تخسا دا پالیسی تیٹی المی ترمیم و کانود جوڑ کننگ نا عمل ءِ سر تننگک۔ او محکمہ توانائی ءِ توانائی نا بدل گیگ آتیان فائدہ ہرفنگ و دا بشخ اٹی زرکاری دوئی کننگ نا جامع پالیسی اس شین تننگ و کانودی سلاہ سوج اکن لاءفرم آتیان کمک ہلنگ نا ہم پارت کرے۔