جوڈیشل کمیشن آف پاکستان نا دیوان،سندھ، اسلام آباد و پشاور ہائی کورٹ کن اہم تقرری تا بابت فیصلہ
چیف جسٹس نا کماشی ٹی مروک دیوان اٹی سندھ و اسلام آباد ہائیکورٹ کن مسہ مسہ ایڈیشنل جج انا سفارش
Get real time updates directly on you device, subscribe now.
جوڈیشل کمیشن آف پاکستان سندھ ہائی کورٹ، اسلام آباد ہائی کورٹ و پشاور ہائی کورٹ کن اہم تقرری و مُد اٹی ودکی نا فیصلہ غاتے کرینے۔ چیف جسٹس آف پاکستان جسٹس یحییٰ آفریدی نا کماشی ٹی سپریم کورٹ نا کانفرنس روم اٹی اڈہلوک دیوان 20 جولائی دوشنبے 2026 نیمروچ نا 2 بجہ غان بیگہ نا پنچ ونیم بجہ اسکان برجا سلیس۔ کمیشن تینا کل باسک آتا گیشتری سلاہ اٹ سندھ ہائی کورٹ نا ایڈیشنل جج جسٹس خالد حسین شاہانی نا مُد اٹی 6 تُو انا ودکی نا سفارش کرے۔ دا سفارش تعلقدار ڈیٹا فارمز، مستین نا ریکارڈ و پیش کروک مواد نا جاچ ہلنگ آن پد کننگا۔ ولے سندھ ہائی کورٹ نا ایڈیشنل جج جسٹس سید فیاض الحسن شاہ نا مُد اٹی ودکی نا سفارش کننگتو۔ داڑان بیدس کمیشن سندھ ہائی کورٹ نا آئینی بینچ آتا مُد اٹی ہم 3 تُو انا ودکی نا منظوری تس۔ سندھ ہائی کورٹ اٹی 5 ایڈیشنل جج آتا تقرری کن کمیشن 3 پن انا سلاہ تس‘ کل باسک آتا کمتی نا سوب آن 2 جاگہ خورک سلیسر۔ سفارش کروک آ پن تے ٹی محمد ہمایوں خان (ایڈوکیٹ)، سریش کمار (ڈسٹرکٹ اینڈ سیشن جج)، ڈاکٹر شاہ نواز میمن (ایڈوکیٹ) اوار ءُ۔ اعلامیہ نا رِد اٹ کمیشن اسلام آباد ہائی کورٹ کن 3 ایڈیشنل جج آتا تقرری نا سفارش کرے، ہرافتیٹی ایاز شوکت (ایڈوکیٹ)، شاہ رخ ارجمند (ڈسٹرکٹ اینڈ سیشن جج) و عمیر مجید ملک (ایڈوکیٹ) اوار ءُ۔ کمیشن پشاور ہائی کورٹ نا 4 ایڈیشنل جج آتا جج اناوڑ اٹ پک کننگ نا سفارش کرے، دا سفارش ہم تعلقدار ریکارڈ و مواد نا جاچ آن پد کننگا۔ پک کننگ کن سفارش کروک آ جج آتیٹی جسٹس فرح جمشید، جسٹس انعام اللہ خان، جسٹس ثابت اللہ خان و جسٹس اورنگزیب اوار ءُ۔ جوڈیشل کمیشن نا دا سلاہ تے داسہ آئینی خواست آتا رِد اٹ پارلیمانی کمیٹی آ گدریفک۔