قرآن کریم نا بے شرفی بیداد ودفنگ نا سوب مریک، شہباز شریف

اسلام آباد :  وزیراعظم محمد شہباز شریف سویڈن اٹی قرآن کریم نا بے شرفی نا واقعہ نا ترند انگا لوز آتیٹی مذمت کرسا پارینے کہ او آئی سی نا پلیٹ فارم آن داشیطانیت نا توننگ نا اسیجائی حکمت عملی اس جوڑ کینہ۔ جمعہ نادے آ وزیراعظم آفس نا میڈیا ونگ آن جاری کروک بیان نا رداٹ وزیراعظم پارے کہ اوآئی سی ءِ امت مسلمہ نا احساس آتا ترجمانی و داشیطانیت ءِ تورفنگ اٹ تاریخی کڑد ادا کننگ ءِ۔ تورات، انجیل و قرآن کریم نا بے شرفی نا موکل تننگ نا فیصلہ ءِ بدل کننگ نا مہم چلیفینہ۔ مقدس کتاب، ہستی و شعائر آتا بے شرفی درشانی نا آخا دنیاءِ آخبت آزار تننگ نا آجوئی ءِ۔ اوپارے کہ واقعہ غاتا ریسہ و شین داہیت انا شاہدی ءِ کہ دا درشانی نا آخا بلکن سیاسی و شیطانی ایجنڈا نا بشخ اسے۔ مچ آ عالم اسلام و مسیحی دنیا ءِ اواری اٹ داسازش ءِ توروئی مریک۔ اوپارے کہ شیطان نا پیروکار ہموکتاب نا بے شرفی ءِ کننگ ءُ ہرا انسان تے شرفمندی تس، حق و راہشونی تس۔ تورات و انجیل نا بے شرفی نا موکل تننگ نا فیصلہ غان بے شرفی ککروک آتا است بڈی مس۔ اوپارے کہ داخار تننگ نا مون آ دننگ ءِ ہرانا جہانی کانود موکل تفک۔ مذہبی جوزہ غاتے ہشکاتننگ، اشتعال انگیزی، دہشت گردی و بیدادی آ ہشکا تننگ نا دا رویہ دنیا ناامن کن مہلک ءِ۔ اوپارے کہ دا رویہ کانودی و اخلاقی ہڑتوم آ رداٹ شدید قابل نفرت و قابل مذمت ءِ۔ سویڈن اٹ قرآن کریم ءِ شہید کننگ ناباندات آ جے یو آئی سربراہ مولانا فضل الرحمان وزیر اعظم میاں شہباز شریف تون ٹیل فون آرابطہ کرینے ہراٹی ہڑتوم آ راہشونک او آئی سی آن سخت گام ہرفنگ آ امنائی کرسا دا امنائی فیصلہ کرینو کہ پاکستان تون اوار مچ آ اسلامی دنیا تینا سفیر تے برانزی وڑ اٹ سویڈن آن پدی بٹنگے‘ ہڑتوم آراہشونک تینا امنائی فیصلہ ٹی پارینو کہ عالم اسلام پد ریسہ و ڈٹ بندی اٹ اسلام و شعائر اسلام نا بے شرفی و مسلمان تا است آزاری کننگ نا پراگندہ و ناپاک عمل آ سخت نوٹس ہلے۔ جے یو آئی نا سروک مولانا فضل الرحمن پارے کہ وزیراعظم وزارت خارجہ ءِ دمدستی پرمان جاری کے‘ دا باندات آ چپ تولنگ کپنہ‘ عالم دین و خطیب آک سویڈن نا دا مکروہ فعل انا مذمت ءِ کیر و الس اٹ بیداری ودی کیر‘ دیکی مدام اسلام و اہل اسلام نا مقدس آ کتاب نا توہین ءِ کرسا تینا دہشت گرد مننگ ءِ پک کرینے‘ جے یو آئی نا کارندہ غاک ہر ضلع ٹی برانزی مچی اڈ ایتر۔

(اے پی پی/ آن لائن)