حکومت نا کنڈ آن سبسڈی غریب و حقدار آتا ریلیف کن ءِ، عمرا ن خان

اسلام آباد(آن لائن ) وزیر اعظم عمرا ن خان پارینے کہ حکومت نا کنڈآن سبسڈی تننگ نا مسخت غریب و حقدار آ بندغ آتا کمک و ریلیف تننگ نا ءِ، جتا جتا وخت آتیٹی حکومتی سبسڈی تا جوان وڑاٹ جاچ ءِ ہلنگ کن خاص ءُ سیل اس جوڑ کننگے تانکہ او ہر بشخ اٹ تروک آ سبسڈی نا جاچ ءِ ہلسا داٹی پین جوانی و دانا فائدہ غاتے ودفنگ کن جامع ءُ سفارش اس پیش کننگ کے۔ حوال نا رداٹ وزیرِ اعظم عمران خان نا کماشی ٹی زرگزران نا بابت جتا جتا ویل آتا بابت اٹ جوڑ مروک آ تھنک ٹینک نا دیوان مس۔ بنجائی وزیر تیان حماد اظہر، سینٹر شبلی فراز، عمرایوب خان، سلاہکار ڈاکٹر عبدالحفیظ شیخ، عبدالرزاق داود، ڈاکٹر عشرت حسین، خصوصی کمکار ڈاکٹر ثانیہ نشتر، ندیم بابر ساڑی ئسر وخت اس کہ ویڈیو لنک نا کمک اٹ مسکوہی وزیرِ خزانہ شوکت ترین، سلطان علی الانہ، عارف حبیب و اعجاز نبی ہم دیوان اٹ بشخ ہلک۔ زرگزران نا بابت تھنک ٹینک نا جوڑ کننگ نا مسخت اہم انگا زرگزرانی ویل آتیا سجفنگ و اوفتا بابت اٹ سفارش و آخبت نا لائحہ عمل ءِ جوڑ کننگ ءِ۔ دیوان اٹ بجلی گیس، فرٹیلائزرز، یوٹیلٹی سٹورز، ایکسپورٹس، ہاوسنگ، احساس ، این ایچ اے و ایلو سرکاری ادارہ غاتا بابت اٹ بجٹ و بجٹ آن پیشن تروک آ سبسڈی تیا جوان بریفنگ تننگا۔ وزیرِ اعظم دیوان آن تران کرسا پارینے کہ حکومت نا کنڈآن سبسڈی تننگ نا مسخت غریب و حقدار آ بندغ آتا کمک و ریلیف تننگ ءِ۔