وزیراعظم نا تعمیراتی پیکیج آن زرگزرانی کاریم تیٹی ودکی مریک، جام کمال

کوئٹہ(خ ن) وزیراعلیٰ بلوچستان جام کمال خان پارینے کہ وزیراعظم عمران خان نا کنڈآن تعمیراتی بشخ اکن تروک آ ریلیف پیکیج آن ملک اٹ زرگزرانی کاریم تیٹی ودکی مریک، ہراڑان پرائیویٹ و سرکاری بشخ اٹ شونداری کاریم اٹ ترندی بریک و گوادر نا شونداری آ ہم جوان ءُ اثر تمک، دا خیال آتا درشانی ءِ او گوادر ڈویلپمنٹ اتھارٹی نا گورننگ باڈی نا 21 میکو دیوان آن تران کرسا کرے۔ چیف سیکرٹری بلوچستان فضیل اصغر، ایڈیشنل چیف سیکرٹری ڈٹ بندی و شونداری عبدالرحمن بزدار، مسکوہی چیف سیکرٹری میر احمد بخش لہڑی، چیئرمین گوادر پورٹ اتھار ٹی نصیر کاشانی و گورننگ باڈی نا ایلو باسک آک ہمو بنجائی و صوبائی کمامدار آک دیوان اٹ بشخ ہلکر، ڈائریکٹر جنرل گوادر ڈویلپمنٹ اتھارٹی شاہ زیب کاکڑ دیوان نا ایجنڈا ءِ پیش کرسا گوادر ماسٹر پلان آ عملدرآمد، کانود و قاعدہ نا تیاری نا کاریم، شونداری نا بنداو نا تخنگ، ٹاون پلاننگ، بلڈنگ کنٹرول و ایلو ویل آتیا بریفنگ تس، گورننگ باڈی نا دیوان اٹ گوادر اٹ ہاوسنگ اسکیم تا بابت بھلو وخت اسے آن ویل آتا گواچی آ کاریم تا خوڑتی اٹ جاچ ءِ ہلسا دا ویل آتے قاعدہ و کانود نا رداٹ زوت اس چٹفنگ نا منظوری تس، ہراڑان ہاوسنگ و شونداری نا بشک اٹ شونداری کاریم اٹ جوانی بریک۔ گورننگ باڈی پرائیویٹ آ بشخ انا شونداری کاریم اٹ ودکی کن جی ڈی اے بلڈنگ ریگولیشن 2020ء ٹی ودکی نا منظوری ہم تس ہرانا رداٹ کیٹیگری اسٹ ارٹ نا جوڑ کننگ کن درکار سٹرکچرل و آرکیٹکٹ انجینئرنگ نا منظوری اِرا مرحلہ غان کم مرسا اسہ مرحلہ اسکان محدود مس وخت اس کہ گورننگ باڈی اِرا منزل نا اُرا نا جوڑ کننگ ءِ مِش انا ٹیسٹ اتون گنڈنگ نا منظوری ہم تس۔