22 جولائی نا برانز تون ننا تعلقداری اف‘متحدہ لوکل بس ایسوسی ایشن
Get real time updates directly on you device, subscribe now.
کوئٹہ (آن لائن) متحدہ لوکل بس ایسوسی ایشن 22 جولائی نا برانز آن بے تعلقی نادرشانی ءِ کرسا پارینے کہ منہ پن انا و مفاد پرست آک لوکل بس ایسوسی ایشن نا پن ءِ کاریم اٹ اتسا سیکرٹری آر ٹی اے ءِ بلیک میل و جندی فائدہ دوئی کننگ خوارہ‘ ننا برانز اتون ہچ ءُ تعلقداری اس اف‘ سیکرٹری آر ٹی اے اسہ ایماندار و فرض شناس ءُ افسر اسے ہرا ٹرانسپورٹر آتا ویل آتے ایسر کننگ کن پبی کوشست کرینے۔ دا خیال آتا درشانی ءِ متحدہ لوکل بس ایسوسی ایشن نا حاجی محمد اسحاق بازئی ناکماشی ٹی اڈ ہلوک دیوان اٹ کننگا‘ دیوان اٹ چیئرمین محمد حنیف شاہوانی، سرپرست اعلی اختر جان کاکڑ، سینئر نائب صدر محمد انور بنگلزئی، نائب صدر ملک ضمیر شاہوانی، سیکرٹری اطلاعات بلند خان شاہوانی، عالم خان کاکڑ، آفس سیکرٹری کلا خان وایلوٹرانسپورٹر آک ساڑی ئسر۔ دیوان آن تران کرسا جنرل سیکرٹری شیر احمد بلوچ پارے کہ لوکل بس ایسوسی ایشن اسٹ انگا تنظیم ءِ ہرا دا جاگہ نا لوکل ٹرانسپورٹ نا نمائندگی ءِ کننگ اٹی ءِ‘ داکان بیدس پین ہچ ءُ تنظیم اس اف‘ منہ دے مست منہ پن انا بندغ لوکل بس ایسوسی ایشن نا تنظیم نا پن ءِ کاریم اٹ اتسا جندی فائدہ دوئی کننگ و فرض شناس سیکرٹری ریجنل ٹرانسپورٹ اتھارٹی نا برخلاف غوغا کننگ اٹی ءُ و ہڑتال و برانز نا دھڑکو ترسا تینا جندی فائدہ دوئی کننگ نا کوشست کننگ اٹی ءُ‘او پارے کہ سیکرٹری آر ٹی اے مہران بلوچ اسہ ایماندار و فرض شناس ءُ افسر اسے ہرا ٹرانسپورٹر تا ویل آتے اولیتی بنداو آ ایسر کننگ نا کوشست کرینے‘ نن پیدوار کینہ لوکل بس ایسوسی ایشن ناکنڈآن 22 تاریخ آ ہچ ءُ ہڑتال سے ناپڑو کننگ تنے ونئے ننا ہڑتال وبرانز تون تعلقداری اس ارے۔