مولانا عبدالقادر لونی نا گاڈی نا خڑک آ بمب دھماکہ، شش بندغ زوال 13 ٹھپی

چمن(اے پی پی) بلوچستان نا علاقہ چمن اٹی جمعیت علماء اسلام نظریاتی نا مرکزی نائب امیر مولانا عبدالقادر لونی نا گاڈی نا خڑک موٹرسائیکل اٹی تخوک بمب دھماکہ، دھماکہ ٹی شش بندغ زوال وخت اس کہ 13 بندغ ٹھپی مسنو ہرافتیان چار ٹھپی مروک آتا حالیت ءِ نازرک پاننگ انگ ءِ۔ سرکاری حوالی نا رداٹ دھماکہ جمعہ نادے آ چمن شار بوغرہ چوک آ جمعیت علماء اسلام نظریاتی اسرائیل مردہ باد نا ریلی و جلسہ غان دمدستی پد مس، ہراٹی محمد ابراہیم، عبدالقاہر، محمد طور، عبدالرشید، محمود الحسن زوال کریر، وخت اس کہ عطاء اللہ، ارشد، محمد حنیف، پشتون، محمد صادق، زییح اللہ، فضل محمد، عبدالبصیر، حکمت اللہ، عظمت اللہ، محمد اقبال، ملک عنایت اللہ و نعمت اللہ ئسک ٹھپی مسر۔ پولیس و سیکورٹی فورس آک واقعہ نا جاگہ غا سرمرسا لاش و ٹھپی تے دمدستی وڑاٹ ڈی ایچ کیو چمن آ مون تسر۔ ہراڑے ٹھپی تے دمدستی وڑاٹ طبی امداد تننگ انگ ءِ وخت اس کہ زیات ٹھپی مروک آتے دمدستی وڑاٹ طبی امداد آن پد کوئٹہ غا پین درمان کن گدریفنگا۔ پولیس و سیکورٹی فورس آک علاقہ نا ناکہ بندی ءِ کرسا مستی جاست وپاست نابناءِ کرینو۔ پولیس نارداٹ دھماکہ خیز مواد اسہ موٹرسائیکل اسے ٹی تخوک ئسر، واقعہ نا غٹ پلو آتے اٹ جاچ ءِ ہلنگ انگ ءِ۔