مسیت آتے ملنگ سخت ءُ فیصلہ اسے، عملدرآمد ءِ پک کننگے، عمران خان
اسلام آباد (اے پی پی) وزیراعظم عمران خان تون پنی آ عالم دین تا ڈل اوڑدہی ٹی لاک ڈاو ن نا بابت اونا موقف نا مخ تفی ءِ کرسا ہروڑ انا کمک نا باور کرفینو۔ وزیراعظم آفس نا میڈیا ونگ آن جاری بیان نا رداٹ وزیراعظم تون اوڑدہی کروک آ ڈل اٹی پیر امین الحسنات شاہ، پیر شمس بن الامین، پیر نقیب الرحمان، مولانا محمد حنیف جالندھری، مولانا طاہر محمود اشرفی، مولانا حامد الحق حقانی، حافظ غلام محمد سیالوی، علامہ راجہ ناصر عباس، صاحبزادہ پیر سلطان فیاض الحسن، مفتی محمد گلزار نعیمی، مولانا سید چراغ دین شاہ و مولانا ضیاءاللہ شاہ اسک ساڑی ئسر وخت اس کہ ویڈیو لنک انا کمک اٹ گورنر سندھ عمران اسماعیل، مفتی منیب الرحمان، مفتی تقی عثمانی اسک ہم بشخ ہلکر۔ وزیر تعلیم شفقت محمود، وزیر مذہبی امور نور الحق قادری، خصوصی کمکار حوالکاری و شینکاری ڈاکٹر فردوس عاشق اعوان ، چیئرمین اسلامی نظریاتی کونسل ڈاکٹر قبلہ ایاز و ایلوفک ہم ساڑی ئسر۔ عالم دین تا ڈل لاک ڈاو ن نا بابت وزیراعظم نا موقف نا مخ تفی ءِ کریر۔ وزیراعظم ءِ عالم دین تا کنڈآن پورو کمکاری نا باور کرفینو۔ دا بابت بنجائی وزیر مذہبی امور پیر نورالحق قادری پارینے کہ مچ آ ملک انا جید انگا عالم دین و مشائخ آک وزیراعظم ءِ ہر وڑ انا کمکاری نا باور کرفینو، حکومت عالم دین تا سلاہ اٹ بروک آ جمعہ مبارک ءِ یوم رحمت نا وڑاٹ اڈتننگ نا فیصلہ ءِ کرینے۔ وزیراعظم نا کنڈ آن عالم دین و مشائخ آتے پاننگانے کہ 20 ٹک آ تالان امنائی لائحہ عمل آ عملدرآمد ءِ پک کننگے۔ دوشنبے نادے وزیراعظم عمران خان تون عالم دین و مشائخ آتا اوڑدہی آن پد میڈیا نا نمائندہ غاتے حوال ترسا اوپارے کہ عالم دین تا دا حالیت اٹ کڑد اسُل اہم ءِ ہندا سوب آن نن عالم دین آتتون حالی حوالی مننگ اُن۔ وزیراعظم نا عالم دین تتون اوڑدہی نا است خواہی ئس و عالم دین تا ہم وزیراعظم تون اوڑدہی نا است خواہی ئس۔ اوپارے کہ جید انگا عالم دین و مشائخ آک وزیراعظم ءِ ہر وڑ انا کمکاری نا باور کرفینو۔ وزیراعظم ہم عالم آتے پارینے کہ کورونا دین انا دے تے ٹی مسیت آتے ملنگ نا حکومت سخت ءُ فیصلہ اس کرینے۔ وزیراعظم عالم دین تے پارینے کہ 20 ٹک آ تالان لائحہ عمل آ عملدرآمد ءِ پک کننگے تانکہ دا حالیت آتے ٹی عالم دین تیا و مسیت آتیا ہچ ءُ ہیت اس بف۔ اوپارے کہ بروک آ جمعہ ءِ یوم رحمت نا وڑاٹ اڈتننگ نا فیصلہ کننگانے۔ اوپارے کہ دا حالیت آتے ٹی نن اللہ نا کنڈ آ رجوع کین۔ او پارے کہ عالم دینک وزیراعظم آن خواست کرینو کہ قرآن پاک شینک کروک آ ادارہ غاتے ہم ملنگ کن نرم پالیسی اس دوئی کننگ کن گام گیج کننگے۔ وزیراعظم عالم دین تے باور کرفینے کہ دا بابت خصوصی گام گیج کیوہ۔ اوپارے کہ عالم دینک وزیراعظم آن داہم خواست کرینو کہ ہرا وڑ دنیاوی تعلیم ٹی وی نا کمک اٹ لس مننگ ءِ ہندا وڑ قرآن حکیم نا تعلیم ءِ ہم آن لائن کننگے۔ وزیراعظم دا بابت ہم عالم دین تے کمکاری نا باور کرفینے۔ وزیر مذہبی امور پارے کہ وزیراعظم عالم دین تے پارینے کہ کورونا وائرس نا بابت ایس او پی تیا جوان عمل کننگے تانکہ کورونا وائرس نا مون ءِ توننگ مرے۔ وزیراعظم عمران خان عالم دین تیان خواست کرینے کہ کورونا دین آن نجات کن خصوصی دعاتا بست و بند اس کننگے۔