دکان تا بند کننگ آ نن ہم ارمانی اُن، اورنگزیب بادینی

کوئٹہ (آن لائن) ڈپٹی کمشنر کوئٹہ اورنگزیب بادینی پارینے کہ کورونا نا جنگ اٹ عالم دین و پوریاگر تیان بیدس جنگ ءِ کٹنگ مفک‘ الس آن خواست ءِ کہ او دا حالیت آتے ٹی اُراتے ٹی رکھی گام گیج کیر‘ دکان تے بند کننگ آن نن ہم خوش مفنہ‘ شاری تیکن ماسک و دستانہ المی گوندنگانے۔ دا خیال آتا درشانی ءِ او میڈیا تون ہیت وگپ کرسا کرے او پارے کہ کل آن مست نن الس اٹ کورونا نا بابت آگاہی فراوان کننگ اٹی ان‘ ضلعی انتظامیہ الس اٹ کورونا نا بابت آگاہی مہم نا بناءِ کرینے‘ حکومت ناکنڈآن کورونا نا بابت پیدوار پارت جاری کننگانے‘ شاری تیکن ماسک و دستانہ المی ءِ۔ کوئٹہ شار اٹ اسہ لکھ بیست ہزار خاہوت کمک نا حقدار ءُ‘32 ہزار خاہوت تون اسہ دے انا راشن ارے‘ 45 ہزار خاہوت تون 15دے انا راشن ارے‘ ایلو ہمو بندغ آک ءُ ہرافتتون 15 دے آن زیات انا راشن ارے‘ نن دکان تے بند کننگ خواتونہ ولے حالیت ننے بیوس کرینے‘ کورونا نا برخلاف جنگ عالم دین و پوریاگر تا کمک آن بیدس کٹنگ مفک الس آن خواست ءِ کہ او تینا اُراتے ٹی مریر۔