ہرنائی‘روچہ ٹی لوڈشیڈنگ ءِ کم کننگک‘حاجی نورمحمد دومڑ

ہرنائی (آن لائن) بی اے پی نا بنجائی راہشون صوبائی وزیر حاجی نورمحمد خان دمڑ پارینے کہ روچہ مبارک نا تُو اٹ حلقہ نا باسن انگا علاقہ غاتے ٹی بجلی نا لوڈشیڈنگ ناوخت وپاس ءِ کم کننگ‘ہرنائی گریڈ اسٹیشن نا آپ گریڈیشن نا کاریم ءِ زوت بنا کننگ کن کیسکو چیف تون حوال کننگ اٹی اٹ‘ داکان بیدس حلقہ نا ہڑتوم آ ضلع غاتے ٹی خاص وڑاٹ ضلع زیارت، سنجاوی نا چندی علاقہ غاتے ٹی پِر و برف آن بھاز آعلاقہ غاتیا ہنوک آ بجلی نا لائن و کھمبہ غاک تماسر ہرافتے زوت بحال کرسا روچہ غان مست لوڈشیڈنگ اٹ کمتی کننگک وخت اس کہ ضلع ہرنائی ہراکہ باسن ءُ علاقہ سے‘ تدوک آ روچہ مبارک آنبار لوڈشیڈنگ نا مسکوہی شیڈول ءِ بحال کینہ۔ دا خیال آتا درشانی ءِ او تینا جاری کروک بیان اسے ٹی کرے۔ صوبائی وزیر پارے کہ دا رد اٹ کیسکو چیف ایگزیکٹو آفیسر محمد عارف تون تدوک آ دے اوڑدہی کرسا ہرنائی و زیارت اٹ بجلی نا لوڈشیڈنگ ٹاسفارم آٹے جوڑ کننگ و لین تا بحالی نا بابت گام گیج کننگ نا پاریٹ‘ کیسکو چیف ایگزیکٹو آفیسر ہر وڑ انا کمک نا باور کرفینے۔