کوئٹہ شار اٹ ٹریفک نظام نا گچینی کن گام گیج المی ءِ، عبدالخالق شیخ

کوئٹہ : آئی جی پولیس بلوچستان عبدالخالق شیخ پارینے کہ کوئٹہ شار اٹ ٹریفک نا نظام ءِ جوان کننگ و کانود آ عملدرآمد کرفنگ نا بابت اٹ سخت گام گیج کننگک۔ ٹریفک نظام نا جوانی و اختہ انگا وخت اٹ ٹریفک نا بابت ویل و اُلسی ویل آتا ایسری نا بابت اٹ ضلعی انتظامیہ تون ملسا جامع حکمت عملی نا رداٹ گام گیج کننگک۔ دا خیال آتا درشانی ءِ او ایس ایس پی ٹریفک آفس کوئٹہ نا دورہ نا وخت آ ہیت وگپ کرسا کرے۔ آئی جی پولیس پارینے کہ صوبائی دارالحکومت کوئٹہ ٹی ٹریفک نا نظام نا جوانی کن مڈل روڈ جوڑ کننگ و داڑتون اوار اوار صوبہ نا ایلو ضلع غاتیٹی تالان مریک کوئٹہ شار اٹ ٹریفک انجیئرنگ بیورو نا جوڑی، پارکنگ پلازہ جات نا جوڑی، جتا جتا چوک آتیا ٹریفک سگنل خلنگ، تنگ انگا روڈ آتے بھلن کننگ، روڈ آتیا موٹر سائیکل اسٹینڈ آتا ایسری و شار اٹ بلڈنگ کوڈ آ عمل درآمد کرفنگ بے کچ المی ءِ۔ ٹریفک پولیس بھاز کچ اٹ انگا وسیلہ و کم نفری آن پد ہم شاراٹ ٹریفک نا روانی ءِ جوان کننگ کن گام گیج کننگک۔ آئی جی پولیس پارت کرسا پارینے کہ رمضان المبارک اٹ ٹریفک پلان جوڑ کننگے تانکہ اُلس زیات ٹریفک کانود نا پاسداری کرے۔ شار اٹ ٹریفک نا نظام ءِ جوان کننگ کن عمل درآمد ءِ پک کننگے و غیر کانودی موٹرسائیکل اسٹینڈ آتا ایسری ءِ کننگے ہرانا سوب آن ٹریفک نا روانی ٹی اُلس ءِ کیہی ویل آک دوئی مریرہ۔ ٹریفک پولیس ٹریفک کانود نا بابت اٹ شاریک خاص کر شاپنگ پلازہ، ہسپتال آتا انتظامیہ و شار اٹ جتا جتا وڑ انا گاڑی، رکشہ غاتا ڈرائیور و موٹرسائیکل سوار آتے ٹریفک کانود آتیان معلومدار کننگے۔

(خ ن)