روچہ ٹی سفا کنوئی گڑا تا فراوانی ءِ پک کننگک، اسد سمالانی

ڈیرہ مراد جمالی : اسسٹنٹ کمشنر ڈیرہ مراد جمالی اسداللہ سمالانی پارینے کہ روچہ نا تو اٹ اُلس ءِ کن خور نا اڑزان گڑاتا فراوانی کن ہر وڑ نا گام گیج کننگ انگ ءِ۔ انجمن تاجران بایدے کہ او اُلس ءِ ماہ صیام اٹ ریلیف فراوان کننگ کن ضلعی انتظامیہ تون کمک کیر تانکہ اُلس نا ویل آتیٹی کمتی برے۔ روچہ نا تو اٹ اڑزان بازار اڈ تننگک۔ ہراٹی سوزی فروٹ سو تون اوار ایلو کن خور نا گڑاتا جوان ءُ نہاد اسے آ اُلس ءِ فراوان کننگک۔ دا خیال آتا درشانی ءِ او روچہ ٹی اُلس ءِ اڑزان نہاد آتیا کن خور نا گڑاتا فراوانی نا بابت اٹ واپار آتا اڈ ہلوک دیوان آن تران کرسا کرے۔ دیوان اٹ انجمن تاجران نا راہشونک تاج بلوچ خان جان بنگلزئی لیاقت علی چکھڑا تون اوار ایلوفک بشخ ہلکر۔ دیوان نا وخت آ اسسٹنٹ کمشنر ڈیرہ مراد جمالی اسداللہ سمالانی پارینے کہ روچہ ٹی کن خور نا گڑاتیٹی پبی ودکی ءِ ہچ ءُ حالیت اسے ٹی سگپنہ۔ دا علاقہ ننا کل انا ءِ۔ ہندا سوب آن دا مبارک تو اٹ گراں فروش آتا خلاف کارروائی ٹی انتظامیہ تون کمک کرے تانکہ اُلس ءِ گڑاس ریلیف رسینگے۔ انتظامیہ تینٹ جوڑ کروک آ کبینی نا کروک آتا خلاف کارروائی کیک۔ سو، سوزی، فروٹ ایلو گڑاتا بہا ءِ سرکاری نرخ نامہ غاتیا عملدرآمد ءِ پک کننگک۔ انجمن تاجران بایدے دا نیک کاریم اٹ ضلعی انتظامیہ تون کمک کیر۔

(خ ن)