ریکوڈک نا پوسکن آ معاہدہ ٹی بلوچستان نا بشخ گمان آن ودانے، قدوس بزنجو

گوادر: وزیراعلیٰ بلوچستان عبدالقدوس بزنجو گوادر اٹی میڈیا تون ہیت و گپ کرسا پارینے کہ کہ ریکوڈک ڈٹ انا پوسکن آ معاہدہ غان بلوچستان ءِ فائدہ مریک، ریکوڈک نا پوسکن آمعاہدہ ٹی بلوچستان نا بشخ گمان آن زیات ودفنگانے، او پارے کہ داکان مست ریکوڈک اٹی بلوچستان نا بشخ بیرہ اِرا درسد ئسکہ، ریکوڈک اٹی سی ایس آر مسہ درسد آن ہم مونی چار و نیم درسد اسکان ودفنگانے، ریکوڈک نا متکن آ معاہدہ نا شیئر ہولڈر کمپنی تیان بشخ ءِ بہا کرسا پیش تمنگ خواہک۔ او پارے کہ نن بنجائی حکومت آن خواست کرینن کہ کمپنی نا بشخ ءِ ہلے و بلوچستان نا پن آ کے تے۔ ریکوڈک اٹی کاریم کروک کمپنی کاریم نا بنا ءِ کننگ آن مست علاقہ نا انفراسٹرکچر و شونداری ڈٹ آتیا چل ارب روپئی خڑچ کننگ نا پابند مریک۔ او پارے کہ گوادر ءِ ایران نا ٹوففٹی بارڈر آن بجلی فراوان کننگ نا فیصلہ کننگانے۔ ہندا تُو اٹی نمائندہ ڈَل اس ایران نا دورہ غا کاہک۔ وزیراعلیٰ بلوچستان پارے کہ شش تُو اٹی گوادر ءِ ایران آن سد میگاواٹ بجلی پین فراوان کننگ نا بنا مریک۔ او پارے کہ مکران ءِ نشینل گرڈ تون گنڈنگ نا عمل ہم ترندی اٹ برجا ءِ۔ او پارے کہ ضلع گوادر اٹی غیر کانودی ٹرالرنگ نا توننگ کن سخت ءُ گام گیج کننگ نا پرمان کننگانے۔ پاکستان کوسٹ گارڈز، ایم ایس اے و میرین ہم غیر کانودی ٹرالرنگ نا توننگ کن فشریز نا کمک ءِ کیک۔ او پارے کہ گوادر اٹی کرار مروک بنجائی و صوبائی پروجیکٹ آتتون اوار سی پیک نا دٹ آتیا کاریم نا رفتار ءِ ترند کننگ نا فیصلہ کرینن۔ گوادر اٹی صدرمملکت، ڈپٹی اسپیکر، کورکمانڈر بلوچستان و سی پیک اتھارٹی نا ساڑی گری آن پک مس کہ نن کل اسہ پیج آٹن۔ او پارے کہ کمک کننگ آ بلوچستان حکومت وزیر اعظم و آرمی چیف نا منت وار ءِ، پاکستان کسٹم بارڈر چیک پوسٹ آتسکان مریک۔ بارڈر آن بیدس شاہراہ تیا کسٹم ءِ چیک پوسٹ خلنگ کن الیپننگ نا فیصلہ کرینن۔