اپوزیشن 2 سال آن ہر وار آ حکومت تون تفنگ اٹی ءِ، سراج الحق

کراچی (مانیٹرنگ ڈیسک) امیر جماعت اسلامی سراج الحق پارینے کہ اپوزیشن 2 سال آن ساڑی حکومت ءِ سپورٹ کرینے، اپوزیشن نا ایجنڈا اسٹ اف۔ کراچی ٹی پریس کانفرنس کرسا سراج الحق پارینے کہ جماعت اسلامی گڑاس سوب نا بنداو آ اپوزیشن نا آل پارٹیز کانفرنس (اے پی سی) ٹی بشخ ہلتو۔ او پارینے کہ حکومت نا خوش قسمتی ءِ کہ اودے ہندن ءُ اپوزیشن اس ملانے ہرا تدوک آ 2 سال آن ہر مرحلہ غا اوڑتون اوار مسنے۔ تحریک انصاف نا حکومت نا 870 دے تیٹی 870 وار اپوزیشن نا بھلا جماعت آک حکومت نا کمک ءِ کریر۔ او پارینے کہ فنانشل ایکشن ٹاسک فورس(ایف اے ٹی ایف) نا پریشر آ حکومت کانود سازی کرسا کرے، نن پیپلز پارٹی و مسلم لیگ ن ءِ پارین کہ دا وارخواہی اسے کہ حقی اپوزیشن نا کڑد ءِ ادا کننگ کن مون آ ببو ولے دا بندغ آک خن تے تر کرسا حکومت تون اوار مسر۔