ترکی، اپوزیشن نا اردگان تون گو تفنگ کن عبداللہ گل ءِ مون آ اتنگ آ سجفنگ نا بنا

 استنبول(آن لائن) ترکی ٹی دا افواہک پیری کننگ اٹی ءُ کہ بروک آ گچین کاری تیٹی صدر رجب طیب اردگان نا مقابلہ ٹی اپوزیشن مسکوہی صدر عبداللہ گل ءِ تینا صدارتی اومیت دار پندار کننگ آ سجفنگ اٹی ءِ۔ عرب نیوز نا رداٹ مسکوہی صدر عبداللہ گل تدوک آ منہ دے آن رجب طیب اردگان آ سخت تنقید کننگ اٹی ءُ۔ اسہ ٹی وی انٹرویو سے ٹی ترک اپوزیشن جماعت ریپبلکن پیپلز پارٹی نا راہشون کمال کیلگدروغلو  پارینے کہ حکومت مسکوہی صدر عبداللہ گل نا پنداری آن بھاز زیات خلیس اٹی ءِ۔ عبداللہ گل آ ملک انا سیکولر حلقہ غاتا کنڈ آن تنقید ہم کننگانے کہ او طاقت نا اسہ بندغ اسے تون ارتکاز کن برجا انگا گام گیج آتا وخت آ چُپ مس او داڑکن ہچ ءُ وڑ اسے نا ضابطہ کار اس تشکیل تننگتنے۔ عبداللہ گل نا بارواٹ پاننگانے کہ او ہندا منہ وخت اٹ مسکوہی زرگزرانی ٹائیکون علی باباکان نا کنڈآن جوڑ کروک آ ڈیموکریسی اینڈ پراگریس پارٹی نا پد اٹی ءِ۔ عرب نیوز نا رداٹ مسکوہی صدر داسکان کن بروک آ الیکشن اٹ بشخ ہلنگ نا بارواٹ چُپی ءِ دوئی کرینے ولدا ہم بھاز آ بندغ آک سمجھرہ کہ ترکی ءِ اسہ جوان ءُ مقابلہ کروک سے نا گرج ءِ۔ وارسا ٹی پولینڈ نا انسٹی ٹیوٹ آف انٹرنیشنل افیئر تون گنڈوک آ تجزیہ کار کیرول واسلیسکی پاہک کہ عبداللہ گل نا گمانی پن مننگ دا کنڈ آ اشارہ کیک کہ ریپبلکن پیپلز پارٹی رجعت پسند اقدار نا کنڈ آ ڈول خننگانے تانکہ اردگان نا جسٹس اینڈ ڈویلپمنٹ پارٹی نا جوان وڑ اٹ مقابلہ ءِ کننگ کے۔ تجزیہ کار کیرول واسلیسکی نا رداٹ عبداللہ گل ءِ اردوغان نا مقابلہ ٹی اتنگ کیہی سوب آن سوب آن بنداو آ جوان ءُ آئیڈیا اس اف۔ اگہ ہندن ءُ اومیت دار اس اتوئی ءِ ہرا اردوگان نا پارٹی نا ووٹر آتے کن قابل قبول مرے تو انقرہ نا اپوزیشن میئر منصور یاواس او استنبول نا اپوزیشن میئر اکرم اماموغلو زیات جوان ءُ۔ عبداللہ گل او رجب طیب اردگان ملسا 2001 ٹی ساڑی حکمران جماعت جسٹس اینڈ ڈویلپمنٹ پارٹی (اے کے پی) نا بنداو ءِ تخاسُر۔ عبداللہ گل 2007 آن 2014 اسکان صدر مس وخت اس کہ او وخت آ اردگان وزیراعظم ئس۔