سینیٹ گچین کاری تے شو آف ہینڈ نا وڑ اٹ کرفنگ نا سلاہ

اسلام آباد : بنجائی حکومت سینیٹ گچین کاری تیکن ڈکوک سلاہ تننگ نا جاگہ غا شو آف ہینڈ نا وڑ وڈول ءِ تینائی کننگ نا سلاہ تے تیار کرینے ہراڑکن سیاسی جماعت آتا سلاہ اٹ آئین نا آرٹیکل59 وآرٹیکل 226 اٹ ترمیم کننگک،گلگت بلتستان نا بروک آگچین کاری تے بائیو میٹرک سسٹم کاریم اٹ اتنگک‘ نیاڑی و اقلیتی آتا نشست آتیا سیاسی جماعت آتا کنڈآن پنداریک گچین کاری تیان پد مریرہ وخت اس کہ گچین کاری بے ضابطگی آ گچین کاری کارندہ غاتے ہم سزا تننگ مریک۔ حکومت گچین کاری تے ٹی شفافیت اتنگ کن 39 ٹک آ تالان سلاہ تے تیار کرینے ہرا کابینہ غان منظوری آن پد پارلیمنٹ اٹ پیش کننگک۔چار شنبے نادے بنجائی وزیر پارلیمانی امور اعظم سواتی و بنجائی وزیر تعلیم شفقت محمود اسیجا پریس کانفرنس نا وخت آ پاریر کہ حکومت گچین کاری تے ٹی پین شفافیت اتنگ کن 39 سلاہ تیا کرینے ہرا کابینہ ٹی پیش کننگرہ و کابینہ نا منظوری آن پد دادے پارلیمنٹ اٹ پیش کننگک۔اوپارے کہ پاکستان اٹ سینیٹ نا گچین کاری تا وخت آ بھلو کچ اسے ٹی ہارس ٹریڈنگ کننگک و تدوک آ گچین کاری تے ٹی اسہ ہندن ءُ سیاسی جماعت اس ہرانا خیبر پختونخوا ٹی بیرہ منہ نشست ئسر سینٹ نا 2 نشست دوئی کرےسس۔ اوپاریر کہ دا وڑ وڈول ءِ بدل کننگ کن حکومت اولیکو وار سینٹ نا گچین کاری تے وزیراعظم و وزیراعلیٰ نا گچین کاری تا وڑ کرفنگ نا سلاہ تے تیا رکرینے و دا مسخت کن آئین نا آرٹیکل 59و آرٹیکل226 اٹ ترمیم کننگک او پاریر کہ اگہ ملک انا ایلوسیاسی جماعت آک دا ترمیم اٹ حکومت تون تفیر تو سینٹ نا بروک آگچین کاری تے شو آف ہینڈ اٹ کرفنگک۔ اوپاریر کہ بدبختی اٹ سینیٹ اٹ پارٹی نا گیشتری مفننگ آن پد ہم کیہی حکومتی بل آک سینیٹ اٹ پد تموک ءُ۔ اوپاریر کہ گلگت بلتستان نا بروک آ گچین کاری تے ہم شفاف جوڑ کننگ کن اوٹی بائیو میٹرک سسٹم کاریم اٹ اتنگک۔

(آن لائن)