پاکستان پننگ نا سوب غلط عدالتی فیصلہ ئس، قاضی فائز عیسیٰ

اسلام آباد : سپریم کورٹ نا سینئر جج قاضی فائز عیسی پارینے کہ 1973نا آئین بیرہ سپریم کورٹ کن آخا اوٹی کل اناحق ارے‘ نن آئین نا تشریح ءِ کننگ کینہ‘ ہراتم بے انصافی مریک تو او زیات ہُرے اسکان سلنگ کپک۔ پاکستان ءِ پرغنگ نا بج ءِ جسٹس منیر دسے ہراڑان ملک اِرا ٹکر مس‘ ہرا کاریم ءِ کننگ کن نن اینو تولوک ان‘ اونا زہم کرن آتیان پد ہم پیش تمک۔1973ء نا آئین نا گولڈن جوبلی نا رد اٹ اڈ ہلوک دود آن تران کرسا سپریم کورٹ نا سینئر جج قاضی فائز عیسی پارے کہ 1973نا آئین بیرہ سپریم کورٹ کن اف داٹی کل انا حق آک اریر‘دا وخت آ آئین ءِ ہمو وڑ پیش کپننگ انگ ءِ‘ آئین بیرہ سیاستدان‘ منہ بندغ‘ پارلیمان و عدلیہ کن اف بلکہ الس کن ءِ‘ پاکستان ءِ جوڑ کننگ کن مشکل ءُ کاریم اس ئس او تو 1947ء اٹ مس ولے مخلوق ءِ آئین تروک آ کاریم وخت آ متو۔ 1956نا دستور ساز اسمبلی نا رد اٹ گچین کاری متوس‘ 1958اٹ اسہ بندغ اس تینا عقلندہ تکسا مارشل لاء خلک۔ 1962 اٹ ہمو بندغ تینا آئین اس جوڑ کرے۔ 1965 اٹ ہمو آئین نا رد اٹ گچین کاریک مسر‘ پورو واکداری آن پد ہم ہراتم حالیت آک خراب مسر تو ولدا ملک ءِ اسہ پین ڈکٹیٹر اسے نا دوٹی تس۔ 1971 اٹ ملک پنا۔ غلط عدالتی فیصلہ ملک انا پننگ نا سوب ئس، جسٹس منیب نا شریعت کورٹ اٹ گورنر جنرل غلام محمد آن پد اسہ سرکاری ملازم اس فیصلہ کرے کہ کنے بھاز عقل ارے‘ فیصلہ نا فیصلہ ءِ پرغبو۔ دا زاری آ بج 1954 نا جسٹس منیر نا فیصلہ ٹی دسنگا۔ 1974 اٹ ملک اٹ اولیکو وار السی نمائندگی اٹ آئین جوڑ کننگا۔ آئین ءِ ہمووڑ پیش کننگپک ہرانا او حقدار ءِ۔ آئین بیرہ اسہ پارٹی تیکن آخا دا کتاب کل اناءِ، 10اپریل 1973 آ اواری اٹ تینائی کننگا و قوم ءِ پیش کننگا۔ جسٹس فائز عیسی پارے کہ آجوئی آن پد ننے آئین ناگرج ئس‘ آئین کن کن بیرہ کتاب اس اف داٹی مخلوق نا حق آک ءُ۔خارتا سوب آک مریرہ‘ چنکا ہیت آتیا اُراک بھس مریرہ۔ چنکا ہیت آ دیر شاغنگتو تو دا وڑ انا ویل آک ودی مریرہ۔ جسٹس فائز عیسیٰ پارے کہ 1971 ٹی قوم انا کاٹم شیف ئس‘ قوم شکی ئس۔ او پارے کہ اوکان گڈ ضیاء الحق 58ٹو بی ءِ کاریم اٹ ایس‘ ولدا اوکان گڈ غلام اسحاق ارا وار 58ٹو بی ءِ کاریم اٹ ایس۔

(آن لائن)