وزیراعظم نا ’پی کے ایل آئی‘ ٹی پوسکن آروبوٹک سرجری نا بنا غا مبارکبادی

اسلام آباد: وزیراعظم محمد شہباز شریف پاکستان کڈنی اینڈ لیور انسٹیٹیوٹ (پی کے ایل آئی) ٹی پوسکن آروبوٹک سرجری نا بناآ خوشی نا درشانی ءِ کرسا دا آسراتی نا بناآ ڈاکٹر و الس ءِ مبارکبادی تسنے۔ چارشنبے نادے آ تینا بیان اٹی وزیراعظم محمد شہباز شریف پارے کہ الحمداللہ پاکستان اٹی جغر و بِک آتا درمان نا ہرا بج ءِ دسیسون اومیوہ تننگ نا بناءِ کرینے، پی کے ایل آئی جوڑ کننگ نا بنداوی مسخت اہل وطن ءِ ملک انا تہہ ٹی جغر و بِک آتا پوسکن آ درمان نا آسراتی تننگ ئسک، دا آسراتی نا بناآن پاکستان اٹی ناجوڑ آتے جغر و بِک آتا ورلڈ کلاس درمان نا ہندی کہول آ آسراتی دُوبریک۔ وزیراعظم دا اومیت نا درشانی ءِ کرے کہ پی کے ایل آئی پاکستان نا ”جان ہاپکنز“ جوڑ مریک اوپارے کہ مسکوہی چیف جسٹس ثاقب نثار 2019اٹی کنا ایلم ءِ زیات تنخواہ ترفنگ ناچکر اٹی چکر اس چلیفتوکہ تو اینو پی کے ایل آئی، بھاز مون آ مسکہ۔ وزیراعظم پارے کہ پاکستان اٹی بِک و جغر نا مرض آتیٹی ترندی اٹ ودکی مننگ ءِ، اومیت ءِ پی کے ایل آئی آن دا مرض آتے توننگ و مرک آتا کچ اٹی کمتی اتنگ اٹ کمک رسینگک۔ اوپارے پاکستان اٹی بِک آتا مرض آن کزیت کروک آ ناجوڑ آتا کچ 2.77 درسد ءِ ہرادے توننگ کن پین گام گیج آتا گرج ءِ۔ وزیراعظم پارے کہ پی کے ایل آئی کون آ اسٹیٹ آف دی آرٹ ہسپتال و علاقہ غاتیٹی ہم جوڑ کینہ۔ اوپارے کہ مسکوہی حکومت ادارہ و سیاسی مخالف آتا برخلاف روبوٹک ٹیکنالوجی ءِ کاریم اٹ اتسا کرے، نن دا ٹیکنالوجی ءِ الس نا خیرخواہی کن کاریم اٹ ایسون۔ اوپارے کہ تعلیم، جان جوڑی نا جہانی کہول انا آسراتی تا پاکستانی تے فراوانی اولیت ءِ۔ وزیراعظم پارے کہ 2018 ٹی الس نا خیرخواہی نا ہرا سفر ءِ توننگاسس، اللہ تعالیٰ نا فضل و کرم اٹ داسہ دُوارہ بناکرینے۔ اوپارے کہ وزیراعظم الس نا خذمت کن انت کہ نہاد اس تروئی تما ایتیوہ۔ الس ناخذمت نا کسر ءِ ہلیپرہ۔

(اے پی پی)